Երիտասարդ հայ թատերական գործիչները` Քիշնևում

Ս. թ. հունիսի 6-13-ը Քիշնևում կայացել է ԱՊՀ և բալթյան երկրների, Վրաստանի երիտասարդ թատերական գործիչների միջազգային համաժողովը, որին ՀՀ մշակույթի նախարարության և Հայաստանի թատերական գործիչների միության աջակցությամբ մասնակցել են երիտասարդ բեմադրիչ Նարինե Գրիգորյանը, դրամատուրգ Հովհաննես Թեքգյոզյանը, թատերագետ Ռուզաննա Առաքելյանը, բեմանկարիչներ Կարինե Եղիազարյանն ու Նարեկ Քեշիշյանը: Համաժողովին իրենց մասնակցությունն են բերել նաև Հայաստանի թատերական գործիչների միության նախագահ Հակոբ Ղազանչյանը, միության քարտուղար Սոնա Մելոյանը և Հովհ. Թումանյանի անվան տիկնիկային թատրոնի գեղարվեստական ղեկավար Ռուբեն Բաբայանը:

Քիշնևում` համաժողովի շրջանակներում, անցկացվել է թատերական փառատոն, բեմանկարիչների աշխատանքների ցուցահանդես, թատերական քննարկումներ, երիտասարդ դրամատուրգների պիեսների շնորհանդես և ռուսաստանյան հեղինակավոր թատերագետների կողմից` վարպետության դասընթացներ: Բեմադրիչ Նարինե Գրիգորյանի «Թռիչք քաղաքի վրայով» ներկայացումը նորարարական ու պատկերավոր լուծումների համար արժանացել է հանդիսատեսի և ժյուրիի բարձր գնահատականին` զբաղեցնելով պատվավոր երրորդ տեղը: Երիտասարդ բեմադրիչը նաև հրավեր է ստացել մասնակցելու Ուկրաինայի և Վրաստանի միջազգային թատերական փառատոներին: Թատերական փառատոնի ժյուրին նախագահում էր լատվիացի հանրաճանաչ ռեժիսոր Ադոլֆ Շապիրոն, ժյուրիի կազմում էին շեքսպիրագետ Ալեքսեյ Բարտոշևիչը, ՌԴ ժող. արտիստ Իգոր Յասուլովիչը, բեմադրիչ և երաժիշտ Վլադիմիր Պանկովը, «Новая Газета» թերթի մշակութային մեկնաբան, թատերագետ Իրինա Չերնովան և այլոք:

ԱՊՀ և բալթյան երկրների երիտասարդ թատերական գործիչների համաժողովի մեկնարկը տրվել է դեռևս 2009 թ. Կիևում: Այս երեք տարիների ընթացքում թատերական միությունները կազմակերպել են մի շարք փառատոներ, ներկայացումների ցուցադրումներ, որոնց քննարկմանը մասնակցել են մոսկովյան փորձագետները. Քիշնևի համաժողովի շրջանակներում մասնագետներն ամփոփել են իրենց աշխատանքները: Համաժողովի կազմակերպիչներն են Թատերական միությունների միջազգային կոնֆեդերացիան և Մոսկվայի Ա.Պ. Չեխովի անվ. միջազգային թատերական փառատոնը` գլխավոր տնօրեն Վալերի Շադրինի գլխավորությամբ:

Ս. թ. հունիսի 20-ին, ՀՀ մշակույթի նախարարությունում կայացած ԱՊՀ և բալթյան երկրների, Վրաստանի երիտասարդ թատերական գործիչների միջազգային հանաժողովին նվիրված մամուլի ասուլիսին մասնակցում էին ՀՀ մշակույթի նախարարության աշխատակազմի ժամանակակից արվեստի վարչության պետ Սեյրանուհի Գեղամյանը, Հայաստանի թատերական գործիչների միության նախագահ Հակոբ Ղազանչյանը, ՀԹԳՄ քարտուղար Սոնա Մելոյանը, Հովհ. Թումանյանի անվան տիկնիկային թատրոնի գեղ. ղեկավար Ռուբեն Բաբայանը, բեմադրիչ Նարինե Գրիգորյանը: