«Հայկական Ժամանակ». ՀԱԿ, ԲՀԿ, ՀՅԴ և «Ժառանգության» պատգամավորները ջախջախեցին կառավարության ծրագիրը

Խորհրդարանում երեկ բոլորովին այլ մթնոլորտ էր, այլ իրավիճակ: Ու հիմնական պատճառը, թերևս, Հայ ազգային կոնգրեսի պատգամավորների ներկայությունն էր նիստերի դահլիճում: Առավոտյան խորհրդարանը սկսեց նոր ձևավորված կառավարության ծրագրի քննարկումը: Այնտեղ էր կառավարության ողջ կազմը, բացակա պատգամավորները շատ քիչ էին: Լրագրողները, որ նախկինում իրենց օթյակներում շատ քիչ էին լինում և նիստերի ընթացքին առանձնապես չէին հետևում, քանի որ դրանք հիմնականում չափազանց ձանձրալի էին, երեկ օթյակներից գրեթե դուրս չէին գալիս: Իրար փոխարեն կոճակ սեղմելու, հորանջող և ձանձրացող դեմքեր տեսնելու փոխարեն, տարիների ընդմիջումից հետո երեկ խորհրդարանում ընթացավ շատ հետաքրքիր քաղաքական քննարկում: Նիստերի դահլիճը, որ նիստերի միայն առաջին՝ առավելագույնը 30 րոպեների ընթացքում էր լիքը լինում, երեկ մինչև աշխատանքային օրվա ավարտը՝ ժամը 18.00-ն, լիքն էր: Կոնգրեսի պատգամավորները, ինչպես նաև խորհրդարանական մյուս երեք ուժերի՝ ԲՀԿ-ի, ՀՅԴ-ի և «Ժառանգության» պատգամավորները պարզապես ջախջախեցին կառավարության ծրագիրը: Ծրագրի քննարկումը, սակայն, երեկ չավարտվեց, և վարչապետ Տիգրան Սարգսյանին այսօր էլ է խիստ ծանր օր սպասվում: Ենթադրվում է, որ նրա կաբինետի ծրագիրը քվեարկության կդրվի այսօր: Խորհրդարանի աշխատանքները, սակայն, ղրանով չեն ավարտվի: Կառավարության ծրագրի քվեարկությունից անմիջապես հետո գումարվելու է Ազգային ժողովի արտահերթ նիստ, և եթե դա ևս այնքան բուռն անցնի, ինչպես երեկվա օրը, չի բացառվում, որ այդ նիստը նույնպես իշխող ՀՀԿ-ն չհաջողեցնի մեկ օրում ավարտել: Երեկ որոշ հանրապետականներ կանխատեսում էին, որ հնարավոր է՝ մինչև երկուշաբթի աշխատեն: