Դասական երաժշտության մասայականացումն անհրաժեշտ է. Մարիամ Շահինյան

Դասական երաժշտությունը պետք է ճիշտ ծրագրերով ներկայացնել և այն կունենա իր դրական արդյունքը,- ասաց «Արվեստների պատկերասրահ» մշակութային հիմնադրամի նախագահ Մարիամ Շահինյանը Լուրեր.com-ի հետ զրույցում։

«Արվեստների պատկերասրահ» մշակութային հիմնադրամը շարունակում է իր ակտիվ գործունեությունը՝ մի շարք փառատոնների տեսքով։ Հիմնադրամի գլխավոր նպատակը դասական երաժշտության մասայականացումն է:

Այս օրերին իրականացվում է Հենրիկ և Գերոնտի Թալալյանների անվան Ալտի և Թավջութակի փառատոնը։ Փառատոնը մեկնարկել է հունիսի 16-ին և կշարունակվի մինչև հուլիսի 9-ը։ Կլինեն թե՛ օտարերկրյա, թե՛ սփյուռքահայ և թե՛ հայ երաժիշտներ։ Այս տարի փառատոնին կմասնակցեն նաև երաժիշտներ մարզերից։

Փառատոնն ամեն տարի ունենում է պատվավոր հյուրեր։ Այս տարին էլ բացառություն չէ և, ի տարբերություն նախորդ տարիների, երբ եղել են հյուրեր ԱՄՆ-ից և Ռուսաստանից, այս տարի հյուրեր կլինեն նաև Պորտուգալիայից, Շվեյցարիայից և Գերմանիայից։ Նվագախումբը կազմված է միայն երիտասարդներից։

Կարևոր հյուրերն են Մոսկվայի կոնպոզիտորների միության նախագահ Օլեգ Գալախովը, թավջութակահարներ Լևոն Մուրադյանը՝ Պորտուգալիայից և Դավիթ Մելքոնյանը՝ Գերմանիայից, կոմպոզիտոր, դաշնակահար և դիրիժոր Միխայիլ Բրոնները՝ Ռուսաստանից, կներկայացվի նաև Ելենա Բարշան, ով աշխարհահռչակ ալտահար և դիրիժոր Ռուդոլֆ Բարշայի այրին է։

Ընդհանուր առմամբ, փառատոնը կազմված է տարբեր միջոցառումներից. հանդիպումներ, համերգներ, ֆիլմի ցուցադրում։ Հունիսի 25-ին Նարեկացի Արվեստի Միությունում տեղի կունենա «Նոտա» ֆիլմի շնորհանդեսը, որը պատմում է Ռ. Բարշայի մասին։ Միջոցառումները կանցկացվեն Գրողների Միության դահլիճում, Նարեկացի Արվեստի Միությունում և Կոմիտասի անվան Կամերային Երաժշտության տանը։

Ճանաչվելով հանրապետական՝ փառատոնն այն անց է կացվում ՀՀ մշակույթի նախարարության հովանու ներքո։