Արժե զենք բռնել իմանալ՝ հաշվի առնելով թշնամի «հարևանների» առկայությունը. զինակոչիկ

Այսօր Lurer.com-ի լրագրողն այցելել էր Կենտրոն վարչական շրջանին պատկանող կենտրոնական զինվորական կոմիսարիատ, որտեղից գարնանային զորակոչի շրջանակներում զինակոչիները պետք է մեկնեին ժամկետային զինծառայության։

Համընդհանուր հուզմունք էր տիրում. համաքվել էին զինակոչիկների հարազատներն ու ընկերները նրանց ճանապարհ դնելու։ Ծնողները հպարտությամբ էին նշում, որ առողջ երեխաներ ունեն, ովքեր պետք է ծառայեն հայոց բանակում։

«Բարձր տրամադրությամբ եմ մեկնում, հպարտ եմ, որ ծառայելու եմ Հայաստանի Հանրապետության կամ ԼՂՀ պաշտպանության բանակում, իմ պարտքն եմ համարում պատվով ծառայել ու հաջողությամբ վերադառնալ։ Արժե զենք բռնել իմանալ՝ հաշվի առնելով թշնամի «հարևանների» առկայությունը. մեկնում եմ այս համոզմունքով ու այն վստահությամբ, որ ձեռք կբերեմ բավականաչափ զինվորական գիտելիքներ և պատեհ առիթի դեպքում ի զորու կլինեմ օգտագործել դրանք»,- ասաց զինակոչիկ Ալբերտ Թադևոսյանը։ 

Սերգեյ Ասատրյանի մայրն էլ իր մտահոգությունը հայտնեց սահմանագծով մեկ տեղի ունեցող միջադեպերի կապակցությամբ, և ցանկացավ, որպեսզի տղան ծառայի ոչ սահմանապահ դիրքերում։

Նորակոչիկներից մեկը՝ Արմեն Սարգսյանը, ավարտել է մագիստրատուրան և այժմ պատրաստ է հայրենիքին իր պարտքը տալու։

«Զղջում եմ նախքան համալսարան ընդունվելը ծառայության չմեկնելուս համար, քանի որ կարծում եմ, որ 18 տարեկանը կոփվելու ու զինվորական կյանք ապրելու ամենանպաստավոր տարիքն է»,- նշել է 24-ամյա Արմենը։

Զինակոչիկների մեկնելուն պես հավաքվածները ծափերով հրաժեշտ տվեցին զինվորական ավտոբուսին՝ վստահ լինելով, որ 2 տարի հետո նույն վայրում կդիմավորեն կոփված տղամարդկանց, որոնք կազմել են հայոց մարտունակ բանակի մի մասը։

Լիլիթ Լալայան