Սևանա լճի ափամերձ տարածքներում առկա է օլիգարխներին պատկանող 4000-ից ավելի շինություն. Հակոբ Սանասարյան

Սևանա լճի ափամերձ տարածքներում առկա է իշխանական համակարգում վստահություն ունեցող հարուստներին պատկանող 4000-ից ավելի շինություն: Այս մասին այսօր լրագրողների հետ հանդիպման ժամանակ ասաց «Կանաչների միության» նախագահ Հակոբ Սանասարյանը:

«Սևանի հարցերով հանձնաժողովի կազմում էլ կան մարդիկ, որոնք շահեր են հետապնդում»,- նշեց Սանասարյանը՝ հավելելով, որ կա Սևանա լճի մակարդակը բարձրացնելու հստակ քաղաքականություն, սակայն գործնականում արվում է հակառակը:

Սրան ի պատասխան, Ջրային տնտեսության պետական կոմիտեի ֆինանսատնտեսագիտական վարչության պետ Մհեր Մկրտումյանն ասաց, որ մոտ 39 հազար հեկտար ոռոգելի հողատարածքները ջրով ապահովելու համար ջուր են վերցնում երկու ջրամբարներից՝ Ապարանի և Ազատի, որոնք անցյալ տարվա համեմատ քիչ ջրաքանակով ունեն, և ջրի պակասորդը փորձում են լրացնել Սևանա լճից:

«Այս հողատարածքներն ապահովելու համար վերցվող ջրաքանակը խիստ անհրաժեշտ է: Սևանա լճի մակարդակը աճ է արձանագրել 2001 թվականից սկսած: 2011-ի դրությամբ ջրի մակարդակը բարձրացել է 3 մ 81 սմ-ով:

Հիշեցնենք, որ օրերս Կառավարությունը հաստատեց ոռոգման ջրի պակասը լրացնելու նպատակով Սևանա լճից լրացուցիչ 150 միլիոն խմ ջուր բաց թողնելու նպատակով կատարվելիք օրենսդրական փոփոխությունների նախագիծն այն պատճառաբանությամբ, թե ջրի սակավության հետեւանքով արտակարգ իրավիճակ է ստեղծվել, ու այն վերացնելու խնդրանքով որոշվել է դիմել ԱԺ։