Էկվադորն Ասանժին ապաստան տալու որոշումը կկայացնի մեկ օրից

Սկանդալային Wikileaks կայքի հիմնադիր ավստրալացի Ջուլիան Ասանժի՝ քաղաքական ապաստան ստանալու խնդրանքին Էկվադորի ղեկավարությունը կպատասխանի 24 ժամից, հայտնում է ABC Հեռուստաընկերությունը:

Հիշեցնենք, որ անցյալ շաբաթ Մեծ Բրիտանիայի գերագույն դատարանը մերժել էր Ասանժի հայցը և որոշում կայացրել ավստրալացուն Շվեդիային արտահանձնելու մասին։ Հիշեցնենք, որ այդ երկրում նա մեղադրվում է երկու կանանց նկատմամբ սեռական բռնության մեջ: Ավելի վաղ հայտնում էին, որ արտահանձման գործընթացը տեղի կունենա որոշման ընդունման օրվանից ոչ ավելի վաղ, քան երկու շաբաթվա ժամկետում: Չսպասելով արտաքսմանը՝ Ասանժը խախտել է տնային կալանքի պայմանները. այդ պատժին նա դատապարտվել էր 2010թ-ին: Այսպիսով, առանց բրիտանացի ոստիկանների իմացության, ավստրալացին, լքելով իր տան տարածքը, գնացել է Էկվադորի դեսպանատուն՝ ապաստան խնդրելու նպատակով:

Մինչ Էկվադորի կառավարության կողմից որոշման կայացումը, Ասանժը կգտնվի այդ երկրի պաշտպանության տակ։ Դեսպանատան տարածք բրիտանական ոստիկանությունն իրավասու չէ մուտք գործել:

«Կառավարությունը քննարկում է իր դիրքորոշումը և վաղն առավոտյան (Երևանի ժամանակով՝ երեկոյան) նախագահը ցուցում կտա»,- ասել է Էկվադորի արտաքին գործերի փոխնախարար Մարկո Ալբուխան։

Wikileaks-ի վերաբերյալ մեծ սկանդալ սկսվեց, երբ կայքն իր էջում հրապարակեց ԱՄՆ-ի դիվանագիտական ծառայության փաստաթղթերը:

2010թ-ի նոյեմբերի 29-ին Wikileaks-ում տեղադրված գաղտնի նյութերն իրենց մեջ պարունակում էին բավականին սկանդալային արտահայտություններ համաշխարհային լիդերների հասցեին: