Թուրքիայի առաջընթացի մասին ԵՄ զեկույցը քննադատական բնույթ է ունենալու. Յոհաննես Հան
Թուրքիա
Եվրամիության կողմից ապրիլին հրապարակվելիք Թուրքիայի առաջընթացի մասին զեկույցը կրելու է քննադատական բնույթ, եթե, իհարկե, մինչ այդ տվյալ երկրում արմատական փոփոխություններ չլինեն:
Այս մասին գերմանական Die Welt պարբերականի հետ զրույցում հայտնել է ԵՄ ընդլայնման և հարևանության հարցերով հանձնակատար Յոհաննես Հանը:
Նա ընդգծել է, որ Բրյուսելն Անկարայից ակնկալում է հարգել հիմնարար ժողովրդավարական իրավունքները, այդ թվում դատական անկախությունը, հավատարմությունն իրավական պետության սկզբունքներին և խոսքի ազատությունը:
Հանն անդրադարձել է նաև Եվրամիությանը Թուրքիայի անդամակցության գործընթացին՝ նշելով, որ անհրաժեշտ է հետևել Ֆրանսիայի նախագահ Էմանուել Մակրոնի խոսքին և անդամակցությունից ավելի կենտրոնանալ այդ երկրի հետ ռազմավարական համագործակցությունը խորացնելու վրա:
ԵՄ հանձնակատարը նշել է նաև, որ գերմանացի լրագրող Դենիզ Յուջելին մեկ տարի կալանքի տակ պահելուց հետո ազատ արձակելու մասին թուրքական կողմի որոշումը ամենևին չի փոխում իրենց մտահոգությունները Թուրքիայում իրավական համակարգում առկա խնդիրների առնչությամբ: «Չենք կարող աչք փակել Թուրքիայում իրավական համակարգի նման լուրջ թերությունների վրա: Ակնհայտ է, որ այդ երկրում քաղաքականությունը ազդում է դատական համակարգի վրա»,- ասել է նա:
ՈՒՂԻՂ ԵԹԵՐ
Ամենադիտված 
Ձմերուկը դարձել է չորս հոգանոց ընտանիքի մահվան պատճառ
