Այսօր կենտրոնից գրքի բույր է գալու, Երևանը գիրք է շնչելու

Երևանում այսօրվանից մինչ հունիսի 24-ը կայանալու է «Բացօթյա ընթերցանության փառատոն»-ը։ Այսօր տեղի է ունենալու «Նվիրիր գիրք» ակցիան, մասսայական ընթերցանություն և համերգ, վաղը՝ «Մանուկները և ընթերցանությունը» խորագրով միջոցառում, հունիսի 23-ին՝ «Գրական հարթակ», իսկ 24-ին՝ ֆլեշմոբ ընթերցանություն։

Հիշեցնենք, որ մայիսի 26-ից մինչև հունիսի 4-ը մի խումբ երիտասարնդեր իրականացրին ընթերցանության շրջագայություն Հայաստանի տարբեր քաղաքներով։

Կամավորներից մեկը՝ Իրինա Բաղդասարյանը, ասաց հետևյալը.

- Սա իմ առաջին համագործակցությունը չէ «Ֆլեշմոբ Դիվիզիա» երիտասարդական ՀԿ-ի հետ: Առաջինը «Մուտքը գրքերով» նախաձեռնությունն էր, որի շնորհիվ էլ շատ ընկերներ ձեռք բերեցի։ Միջոցառման շրջանակներում շրջագայություններով գնացինք Գյումրի, Ապարան, Վանաձոր, Աշտարակ, Եղեգնաձոր, Աբովյան, Էջմիածին և իրականացրինք մեր պլանավորածը: Շրջագայությունների ժամանակ կարդացի Վոյնիչի և Վերբեռի ստեղծագործությունները: Կարծում եմ՝ այսօր մեկնարկած «Բացօթյա ընթերցանության փառատոնը» նույնպես շատ լավ կանցնի:

Կամավորներից մյուսի՝ Շուշանիկի խոսքերով նախաձեռնությունը շատ լավն է: Այս ծրագիրը հնարավորություն է տալիս հասարարակական վայրերում՝ այգիներում, սրճարաններում անկաշկանդ գիրք կարդալ:

- Ընթերցանության շրջագայության ժամանակ գնացել եմ Արմավիր, Էջմիածին, Վայք, Եղեգնաձոր, Գավառ: Ամենուրեք լավ մթնոլորտ էր, մարդկանց հետաքրքրում էր, թե այս երիտասարդները ինչ են անում, ինչ են կարդում: Այժմ պատրաստվում եմ գնալ ժամը 14։00-ին Կասկադում կայանալիք ընթերցանությանը, որից մեծ սպասելիքներ ունեմ։

«Ֆլեշմոբ Դիվիզիա» երիտասարդական հասարակական կազմակերպության խորհրդի նախագահ Արմենակ Սուքիասյանը Լուրեր.com-ի լրագրողի հետ զրույցում նշեց.

- 2010 թվականին «Բացօթյա ընթերցանության փառատոն»-ին մասնակցել է 350 ընթերցասեր, 2011-ին՝ ավելի քան 700 հոգի, իսկ այս 4 օրերի ընթացքում կմասնակցի մոտավորապես 1500-2000 հոգի։ Կասեմ հետևյալը՝ այսօր կենտրոնից գրքի բույր է գալու, Երևանը գիրք է շնչելու։ Այժմ աշխատում ենք, որ փառատոնը կրի միջազգային ֆորմատ։