Նամակ Տարոն Մարգարյանին՝ կապված Նանսենի այգում ընթացող շինարարության հետ

«Մե´նք ենք այս քաղաքի տերը» քաղաքացիական նախաձեռնությունը Նանսենի այգում ընթացող շինարարության հետ կապված նամակ է ուղարկել Երևանի քաղաքապետ Տարոն Մարգարյանին՝ խնդրելով պատասխանել իրենց հետաքրքրող հարցերին։ Ստորև ներկայացնում ենք նամակն ամբողջությամբ։

«Հարգելի պարոն քաղաքապետ,

Երևան քաղաքի ընդհանուր օգտագործման տարածքները, զբոսայգիներն ու պուրակները գնալով ավելի հաճախ են զոհ դառնում կառուցապատման և բնության հանդեպ անխնա վերաբերմունքին, որն արժանանում է Երևանի բնակիչների դժգոհությանն ու բացասական արձագանքին:

Արդեն 4 օր է, ինչ Նոր Նորքի առաջին զանգվածի Նանսենի անվան զբոսայգում ընթանում են կառուցապատման աշխատանքներ: Տարածքում կա ցուցանակ շինարարության թույլտվության մասին՝ տրված Երևանի քաղաքապետարանի կողմից, սակայն այն բավարար տեղեկատվություն չի պարունակում, ուստի հիմք ընդունելով «Տեղեկատվության ազատության մասին» ՀՀ օրենքի 6-րդ և 9-րդ հոդվածների պահանջները, խնդրում ենք օրենքով սահմանված ժամկետում մեզ տրամադրել հստակ և մանրամասն տեղեկատվություն հետևյալ հարցերի վերաբերյալ, ինչպես նաև անհրաժեշտության դեպքում կցել որոշումների և նախագծերի պատճեններ .

1) Ե՞րբ և ո՞ր իրավական ակտի հիման վրա է Երևան քաղաքի Նոր Նորքի առաջին զանգվածի Նանսենի անվան զբոսայգու մաս հանդիսացող տարածքի նպատակային և գործառնական նշանակությունը փոփոխվել, արդյոք այն համապատասխանո՞ւմ է Երևանի գլխավոր հատակագծին և հայեցակարգին:

2) Ե՞րբ են կատարվել հողհատկացումները, ի՞նչ իրավական ակտերով, որքա՞ն մակերեսով, ի՞նչ նպատակով, ի՞նչ իրավունքով և որքա՞ն ժամկետով, և ամենակարևորը' ո՞ւմ է հատկացվել:

3) Քաղաքաշինական ի՞նչ ծրագրային փաստաթղթերի հիման վրա են ընդունվել հողհատկացումների վերաբերյալ որոշումները:

4) Կա՞ն, արդյոք, ճարտարապետահատակագծային առաջադրանքներ, քաղաքաշինական փորձաքննության եզրակացություններ և շինարարության թույլտվություններ տվյալ թանգարանի համար:

5) Արդյոք իրականացվե՞լ է հասարակության ծանուցում և քննարկում տվյալ տարածքում կենսագործունեության փոփոխություն ակնկալող քաղաքաշինական գործունեության վերաբերյալ, եթե այո, ապա' ե՞րբ, ո՞ր լրատվամիջոցներով, ո՞ւմ մասնակցությամբ (խնդրում ենք կցել հանրային քննարկման արձանագրության պատճենը):

6) Ո՞ր իրավական ակտի հիման վրա է հաստատվել բուն թանգարանի նախագիծը (ինչ է ներկայացվելու թանգարանում, ինչ բովանդակային լուծումներ են տրվելու և ո՞վ է պատասխանատու այդ ամենը մշակելու համար):

7) Արդյո՞ք կան խնդրին առնչվող այլ մարմինների, մասնավորապես՝ ՀՀ Մշակույթի նախարարության կամ մշակութային հարցերով պատասխանատու տարածքային մարմինների եզրակացությունները թանգարանային նախագծի վերաբերյալ:

Տեղեկատվության տրամադրումը մերժելու դեպքում խնդրում ենք գրավոր տեղյակ պահել մերժման հիմքերի մասին եւ հնարավորության դեպքում տրամադրել այն պետական մարմնի կամ պաշտոնատար անձի հասցեն, որին կարող ենք ուղղել հարցումը»։

Հիշեցնենք, որ քաղաքապետը պարտավոր է հարցմանը պատասխանել 5-օրյա ժամկետում, իսկ եթե հարցն այնպիսին է, որ պատասխանը չի կարող պատրաստ լինել այդ ժամկետում, ապա քաղաքապետը պետք է 5-օրյա ժամկետում նշի այն օրը, երբ պատասխանը պատրաստ կլինի, ոչ ուշ, քան դիմումը ներկայացնելուց հետո 30 օրվա ընթացքում։