Ինչպե՞ս վարվել անսարք ջրաչափի հետ

Այսօր «Պոստ Սկրիպտում» մամուլի ակումբում «Երևան Ջուր» ՓԲԸ Հաղորդակցության ու հաճախորդների հետ փոխհարաբերությունների տնօրեն Գագիկ Մարգարյանը խոսեց փչացած ջրաչափերի մասին։

Լրագրողների հարցին, թե ինչպես վարվել անսարք ջրաչափ սարքերի հետ, եթե այդ պահին հաճախորդի հնարավորությունը չի ներում նոր ջրաչափ գնել, Մարգարյանը պատասխանեց. «Կառավարության որոշման համաձայն՝ ջրաչափերը սպառողների սեփականությունն են։ Յուրաքանչյուր սարք, ինչպես և ջրաչափը ունի գործածության ժամկետ։ Այդ ժամանակը սպառվելուն պես հաճախորդը պետք է նոր սարք ձեռք բերի»։

Հարցին, թե ի՞նչ անի այն սպառողը, ով ջրաչափի համար չունի գումար, քանի որ բազմաթիվ են տեղեկությունները, որ շատ բաժանորդներ ակտավորվում են, եթե չեն պահպանում ջրաչափ սարքերի հետ կապված կանոնները, Մարգարյանն ասաց. «Եթե լաբորատորիաներն ունեն համապատասխան դետալ, ապա կարելի է փչացած դետալը փոխել ու ևս հինգ կամ տասը ամիս օգտագործել ջրաչափը»։