Ազատ քաղաքացիներ՝ ազատ ու արդար երկրում. Վիտալի Բալասանյան

Այսօր ԼՂՀ-ում պաշտոնապես մեկնարկել է նախագահական ընտրությունների նախընտրական քարոզարշավը։ Այս կապակցությամբ Լուրեր.com-ը զրուցել է նախագահի թեկնածու, Արցախի հերոս Վիտալի Բալասանյանի հետ։

-Ո՞րն է Ձեր գլխավոր կարգախոսը։ Ունե՞ք այլ կարգախոսներ։

Հիմնական կարգախոսը՝ «Ազատ քաղաքացիներ՝ ազատ ու արդար երկրում»։ Տարբեր նյութերում օգտագործվում են նաև այլ կարգախոսներ, ինչպես՝ «Հերոս ժողովրդին՝ հերոս նախագահ»:

-Քարոզչության ո՞ր միջոցներից եք օգտվում։

Գրեթե բոլոր: Օգտվում ենք հանրային հեռուստատեսության և ռադիոյի մեզ հատկացված ժամանակահատվածից, էջ ունեմ ֆեյսբուքում, ներկայացված եմ նաև Թվիթեր միկրոբլոգում: Ստեղծվել է նաև http://vitalybalasanyan.com/ կայքը, որտեղ տեղադրվում են նյութեր մեր նախընտրական հանդիպումներից, իմ հարցազրույցները և հոդվածները:

-Մենք տեղեկացել ենք, որ Ձեր նախընտրական հանդիպումների շարքը սկսել եք Արցախի պետական համալսարանից։ Ինչո՞վ էր դա պայմանավորված։ Դրանում կա՞ր որևէ message։

Քարոզարշավի առաջին օրը նաև խորհրդանշական բնույթ ուներ: Ես հանդիպում եմ ունեցել ոչ միայն համալսարանում, այլ նաև ոստիկանության ծառայողների հետ, իսկ օրվա երկրորդ կեսին այցելել Ուղտասար, Խրամորթ, Նախիջևանիկ, Վարդաձոր համայնքներ: Համալսարան-ոստիկանություն-ազատագրված տարածք և արցախյան գյուղ երթուղին ցույց է տալիս իմ ծրագրի առաջնահերթությունները՝ զարգացած կրթություն և գիտություն, օրինապահություն, Արցախի վերաբնակեցում, գյուղի զարգացում:

-Նախընտրական քարոզարշավի շրջանակներում լինելո՞ւ եք սահմանամերձ գյուղերում։

Ինչպես նշեցի, առաջին իսկ օրն այցելել ենք նման գյուղեր: Մենք ձգտելու ենք լինել Արցախի բոլոր համայնքներում:

-Եթե ընտրվեք նախագահ, կոնկրետ ի՞նչ քայլեր եք ձեռնարկելու սահմանամերձ գյուղերում ժողովրդագրական աճի համար։

Իմ ծրագրում գյուղատնտեսության զարգացմանը և գյուղական ենթակառուցվածքների ստեղծմանը մեծ տեղ է տրված: Երկրի համաչափ զարգացումը իմ գլխավոր նպատակներից է: Ես ինքս ծնվել եմ շրջանում, այժմ էլ բնակվում եմ ծննդավայրումս: Անթույլատրելի է թուլացած գյուղ ունենալը: Պետությունը պետք է կարողանա առնվազն գյուղական անհրաժեշտ ենթակառուցվածքներ ստեղծել՝ ճանապարհ, էլեկտրականություն, ջուր, գազ, հեռախոսակապ, համացանց: Վստահ եմ, որ նման պայմաններ ստեղծելուց հետո մեր գյուղական բնակչության թիվը շեշտակի կաճի: Առանց զարգացած գյուղի Ստեփանակերտն ապագա չունի: Բնակչության զգալի մասի կենտրոնացումը Ստեփանակերտում մարտահրավեր է մեր անվտանգությանը:

-Այս ընթացքում Ձեր նախընտրական շտաբը վարչական ռեսուրսի չարաշահում, ընտրակաշառքի բաժանման դեպքեր արձանագրե՞լ է։

Ընտրակաշառքի դեպքեր չենք արձանագրել, իսկ վարչական ռեսուրսի չարաշահման դեպքերի մասին ես արդեն հայտնել եմ վերջերս հրատարակված իմ բաց նամակով:

-Լրատվամիջոցները քարոզարշավի մասնակիցներին հավասար եթերաժամանակ տրամադրո՞ւմ են։

Քարոզարշավը նոր է սկսում: Այսօր ընդամենը երկրորդ օրն է: Դրա մասին երևի հնարավոր կլինի խոսել շաբաթներ անց:

-Այս ընթացքում Ձեր նկատմամբ հակաքարոզ գրանցվե՞լ է։

Ոչ:

-Ի՞նչ ակնքալիքներ ունեք նախագահական ընտրություններից։

Ակնկալում եմ ակտիվ մասնակցություն ընտրություններին և խոհեմ ընտրություն: Ժողովուրդը պետք է ցույց տա, որ ինքն է իշխանության կրողը, և ինքն է որոշում՝ ում պատվիրակի իշխանական լիազորությունների իրականացումը: Միայն այս ձևով հնարավոր կլինի մեծացնել իշխանությունների պատասխանատվության մակարդակը: