«Ժողովուրդ». Երեկ նախագահի նստավայրում տեղի է ունեցել դատաիրավական խնդիրներին և բարեփոխումներին նվիրված խորհրդակցություն

Երեկ ՀՀ նախագահի նստավայրում տեղի է ունեցել դատաիրավական խնդիրներին և բարեփոխումներին նվիրված խորհրդակցություն: Թերթը հիշեցնում է, որ նմանատիպ մի խորհրդակցություն էլ Սերժ Սարգսյանը հրավիրել էր 2011-ի ապրիլի 21-֊ին՝ հանձնարարելով «նոր թափ հաղորդել» մարտի 1-ի գործին: Սակայն մինչ օրս այդ գործը շարունակվում է «քնել»:

Թվում էր՝ երկրի ղեկավարը երեկ հավաքած ձևաչափում որևէ կերպ պետք է արձագանքեր «Հարսնաքար»-ի ծեծի խայտառակ դեպքին, բայց ոչ: Սերժ Սարգսյանից աջ նստած ազդեցիկ պաշտոնյան (ըստ թերթի լուսանկարի՝ դա Գագիկ Հարությունյանն է) հոգացել էր օրակարգի մանրամասները՝ սլաքն ուղղելով փաստաբանների բողոքին և այն հանդարտեցնելու «դժվարագույն» խնդրին: Դրա համար էլ որևէ էական հարց (գոնե պաշտոնապես) ՀՀ նախագահը չի քննարկել ուժային կառույցների ղեկավարների հետ:

«Ժողովրւրդ»-ի՝ ՀՀ նախագահի նստավայրին մոտ կանգնած աղբյուրները փոխանցում են, որ Սահմանադրական դատարանի նախագահ Գագիկ Հարությունյանը հատկապես վերջին շրջանում լրջորեն զբաղվում է ՀՀ վճռաբեկ դատարանի նախագահ Արման Մկրտումյանով: Սարգսյանի հետ միջնորդավրրված խնամի Հարությունյանն իր առջև խնդիր է դրել առավելագույնը ՀՀ արդարադատության նախարար, իր սիրելի Հրայր Թովմասյանին նշանակել տալ Վճռաբեկ դատարանի նախագահ, իսկ նվազագույնը նախազգուշացնել Մկրտումյանին, որպեսզի ավելի վերահսկելի դառնա (հավանաբար դա էր պատճառը, որ երեկվա նիստին Մկրտումյանը չկար): Բանն այն է, որ Մկրտումյանն իրեն դատական իշխանության լիակատար տեր է զգում՝ հաճախ ՍԴ-ին մեղադրելով անարդարության մթնոլորտի արմատացման մեջ:

Իհարկե, Հրայր Թովմասյանը թերթի տեղեկությունները համարել է «բեսեդկային բամբասանքներ», սակայն դրանից իրավիճակը չի փոխվում: Ժամանակին նա գրեթե այդպես կտրուկ հերքում էր, որ նախարար է դառնալու: