«Հայկական Ժամանակ». Պետպատվերով հիվանդը բժիշկների անտարբերության պատճառով հեռացել է հիվանդանոցից

62-ամյա Ալիսա Դավթյանը երկու օր Երևանի թիվ 1 հիվանդանոցային համալիրում է անցկացրել և ուղղակի ապշած է այնտեղ ստացած վերաբերմունքից:
Թերթի թղթակցի հետ զրույցում երկրորդ խմբի ցմահ հաշմանդամ այս կինը պատմել է, որ տեսնելով՝ բժշկական հաստատությունում իրենով զբաղվող բժիշկ չի գտնվում, երկու օր անց թողել հեռացել է: Նա մեկ այլ բաժանմունքից տեղափոխվել էր վերակենդանացման բաժանմունք: Թերթի թղթակցին Ալիսա Դավթյանը պատմել է, որ ինքը ռևմատիկ հիվանդ է, երկար ժամանակ բուժում է ստանում: Ասել է, որ ենթադրաբար իր մոտ առաջացած խնդիրները ստացած դեղորայքից են՝ թունավորում կամ ալերգիա: Կինը նախ դիմել է Սրտաբանական հիվանդանոցի «Նորք-Մարաշ» բժշկական կենտրոնի իր բժշկին: Այստեղ տեսնելով, որ տվյալ դեպքում ի զորու չեն օգնել Ալիսա Դավթյանին, շտապ օգնություն են կանչել, և նա տեղափոխվել է թիվ 1 հիվանդանոցային համալիր: Նրա խոսքով, այստեղ իրեն երկու օր անընդմեջ կաթիլային ներարկում են արել՝ չորս լիտր հեղուկ, իսկ դրանից հետո տարբեր մասնագետներ են եկել և ասել, որ նա իրենց հիվանդը չէ և հրաժարվել են օգնություն ցուցաբերել: Համապատասխան բժիշկ այդպես էլ չի գտնվել: Տեսնելով այդ անտարբերությունը՝ Ալիսա Դավթյանը հեռացել է հիվանդանոցից: Նա համոզված է, որ այս ամենը պայմանավորված է իր՝ պետպատվերով հիվանդ լինելով: