Իտալիայում կվերսկսվեն Մոնա Լիզայի աճյունի որոնման աշխատանքները

Հունիսի 29-ին Ֆլորենցիայում կվերսկսվեն Լիզա Գերարդինայի՝ Լեոնարդո դա Վինչիի Մոնա Լիզայի բնորդուհու, աճյունի պեղումները։ Ինչպես հայտնում է ANSA-ն՝ հետազոտություների երկրորդ փուլի համար նախատեսված է հատկացնել 110 հազար եվրո։

Որոնումները նախաձեռնել է Պատմական ու մշակութային ժառանգության ամրապնդման ազգային կոմիտեի նախագահը՝ պրոֆեսոր Սիլվանո Վինչեթին: Պեղումների առաջին փուլը սկսվել է 2011թ-ի ապրիլից և ավարտվել դեկտեմբերին, քանի որ հետազոտությունների համար նախատեսված գումարը սպառվել է։

Այն ժամանակ գիտնականները հայտնաբերել էին կնոջ կմախք, սակայն պարզվել էր, որ այն 200 տարով մեծ է Լիզա Գերարդինայից:

Գիտնականները ենթադրում են, որ Գերարդինայի աճյունը պետք է փնտրել Ֆլորենցիայի նախկին Սուրբ Ուրսուլա մենաստանի տարածքում: Հատկապես նման կարծիքի է պատմաբան Ջուզեպպե Պալանտին, ով Գերարդինայի աճյունի գտնվելու վայրի մասին տեղեկությունների էր հանդիպել աղբյուրներից մեկում։

Լիզա Գերարդինան եղել է ֆլորենտացի վաճառական Ֆրանչեսկո դել Ջոկոնդայի կինը: Նրա՝ Դա Վինչիի համար բնորդուհի հանդիսանալու եզրակացությանը հանգել է 16-րդ դարի հայտնի իտալացի գիտնական Ջորջիո Վազարին՝ «Առավել հայտնի նկարիչների, քանդակագործների և ճարտարապետների կյանքը» գրքի հեղինակը։ Ըստ մեկ այլ վարկածի՝ բնորդուհի կարող էր հանդիսանալ նաև Միլանի հերցոգի Բիանկո Սֆորցի դուստրը։

Բացի այդ, մի շարք հետազոտողներ նաև գտնում են, որ նկարում պատկերված է հենց ինքը՝ Լեոնարդո դա Վինչին։