Արդյոք Արցախում ընդդիմություն կա՞. մեկնաբանում են փորձագետները

Վիտալի Բալասանյանին սպասվում է մեծ աշխատանք ընդդիմադիր դաշտը վերակենդանացնելու, ուժ ստեղծելու և պայքար ծավալելու համար: Լուրեր.com-ի հետ զրույցում նման կարծիք հայտնեց «Ժողովրդավարություն հանուն զարգացման» ՀԿ ներկայացուցիչ Արմեն Գրիգորյանը: Նա մատնանշեց Freedom House իրավապաշտպան կազմակերպության 2011 թվականի զեկույցը, որում Արցախն ընդգրկված է «ոչ ազատ» պետությունների խմբում:

«Հաշվի է առնվել այն հանգամանքը, որ 2010 թ. Ազգային ժողովի ընտրությունների արդյունքում ընդդիմությունը հնարավորություն չի ստացել ներկայացված լինելու օրենսդիր մարմնում և ընտրությունների արդյունքում ընդդիմությունը դադարել է գոյություն ունենալ որպես ուժ»,- նշեց Գրիգորյանը:

Մեր հարցին, թե կարո՞ղ ենք ասել, որ Արցախում ընդդիմությունն արդեն ձևավորված է, Գրիգորյանը պատասխանեց, որ դեռ վաղ է խոսել ընդդիմության ձևավորման մասին:

«Մեծ աշխատանքներ կան անելու, սակայն կարևոր է նշել, որ մարդկանց խումբ է ձևավորվել, ովքեր իշխանության գալու հավակնություններ են ներկայացրել, և դա արդեն դրական տեղաշարժ է»,- ասաց Գրիգորյանը՝ հավելելով, որ կարելի է խոսել ընդդիմության ձևավորված լինելու փաստի մասին այն դեպքում, եթե այդ խումբը հասարակության մեջ եղած բողոքը վեր հանի ու քաղաքական օրակարգ բերի:

Հարցին, թե նախագահի չորս թեկնածուներից Լեռնային Ղարաբաղի հակամարտության հարցում ո՞րի մոտեցումն է ավելի ճիշտ համարում, Գրիգորյանը պատասխանեց, որ Վիտալի Բալասանյանի դիրքորոշումը շատ կարևոր է Արցախի անվտանգության հետագա զարգացման համար:

«Նա հանդես է եկել Արցախի ներկայիս տարածքների պահպանման, վերաբնակեցման ու զարգացման թեզով: Սա մեծ փոփոխություն է Արցախում, քանի որ մինչ այժմ մենք լսում ենք տարածքներ հետ տալու մասին, և որևէ քաղաքական ուժ դեռ նման թեզ պաշտպանելու հայտարարությամբ հանդես չի եկել»,- ընդգծեց Գրիգորյանը:

Լուրեր.com-ի հարցին, թե արդյոք առաջիկա ընտրությունները որևէ բան կփոխե՞ն հակամարտության լուծման գործընթացում, Գրիգորյանն ասաց, որ եթե ընտրությունների արդյունքում իշխանափոխություն չլինի, ապա բանակցային գործընթացում ևս փոփոխություններ չեն լինի ու ամեն ինչ կմնա նույնը:

«Եթե այլ թեկնածու հաղթանակ տանի, ապա մեծ փոփոխություններ հնարավոր են, նույնիսկ մինչև բանակցային գործընթացում Արցախի ընդգրկում»,- եզրափակեց Գրիգորյանը:

Քաղաքագետ Նարեկ Գալստյանն էլ մեզ հետ զրույցում կարծիք հայտնեց, որ Արցախում քաղաքական դաշտը շատ ավելի կազմակերպված է, քան Հայաստանում:

«Չէի փորձի կանխատեսումներ կամ գնահատականներ տալ, բայց ամեն դեպքում Արցախում նույնպես քաղաքական ինստիտուտները որոշակի զարգացման փուլ են անցնում»,- ասաց նա՝ հավելելով, որ այնտեղ պետական, քաղաքական ինստիտուտներն ու ընդհանրապես քաղաքական դաշտը շատ ավելի կազմակերպված է, քան Հայաստանում:

Հիշեցնենք, որ նախագահական ընտրությունները Լեռնային Ղարաբաղում նախատեսված են հուլիսի 19-ին: Հիմնական համարվող երկու թեկնածուներից՝ Բակո Սահակյանից եւ Վիտալի Բալասանյանից բացի ԿԸՀ-ն գրանցել է նաեւ գիտաշխատող Արկադի Սողոմոնյանի եւ թոշակառու Վալերի Խաչատրյանի թեկնածությունները:

Արա Հարությունյան