Սևանի բարձրացումն ինքնանպատակ չպիտի լինի. Անդրանիկ Անդրեասյան

Այսօր Ազգային ժողովի արտահերթ նիստում քննարկվում է ՀՀ Կառավարության կողմից ներկայացրած «Սևանա լճի մասին» եւ «Սևանա լճի էկոհամակարգի վերականգնման, պահպանման, վերարտադրման եւ օգտագործման միջոցառումների տարեկան եւ համալիր ծրագրերը հաստատելու մասին» ՀՀ օրենքներում լրացումներ կատարելու օրենքների նախագծերի փաթեթ, որի ընդունմամբ ակնկալվում է ոռոգման ջուր մատակարարել Սեւան-Հրազդան էներգետիկ-իրիգացիոն համակարգից սնվող ոռոգման համակարգերի ներքո ոռոգելի հողերին։

Ջրային տնտեսության պետական կոմիտեի նախագահ Անդրանիկ Անդրեասյանը օրենքի նախագծի ներկայացման ժամանակ  նշել է, որ այսօր արտակարգ իրավիճակ է ստեղծվել ջրի սակավության պատճառով։

«Վտանգված է Արարատյան դաշտավայրի գյուղացիական համալիրը: Մեկ հեկտարի ջրի պահանջարկի հաշվարկ է իրականացվել։ Պարզվել է, որ այն ջրային պաշարը, որ մենք այս պահին ունենք, շատ արագ սպառվելու է։ Եթե ցանկանում ենք ապահովել ոռոգման ջրի նորմալ մատակարարումը, ապա պետք է ընդունել օրենքի նախագիծը և լրացուցիչ 150 մլն խորանարդ մետր ջուր վերցնել Սևանա լճից, որպեսզի գյուղատնտեսությունում խնդիր չունենանք, քանի որ Սևանի բարձրացումը ինքնանպատակ չպիտի լինի, լճի ջուրը պետք է օգտագործել անհրաժեշտության դեպքերում»։

Քննարկման ժամանակ պատգամավորները հարց բարձրացրին նաև արտեզյան ջրերի անխնա օգտագործման հիմնավորման մասին, որին ի պատասխան՝ Անդրեասյանը հաստատեց, որ բոլոր գործողությունները կատարվում են հաշվարկների հիման վրա։

Բնապահպանության նախարարությունը ներկայացրել է նախագծի մասին դրական եզրակացություն, ըստ որի՝ տարվա մեջ Սևանի մակարդակը իջնում- բարձրանում է մոտ կես մետր, այսինքն՝ լրացուցիչ 150 մլն խորանարդ մետր ջուրը չի բերի որևէ բացասական հետևանքի Սևանի էկոհամակարգի վրա։ 

ՀՅԴ պատգամավոր Աղվան Վարդանյանն էլ ավելացրեց, որ նման դրական եզրակացությունները կարող են ներկայացնել նաև ադրբեջանական տարբեր կառույցները, իսկ իրականում էկոլոգիայի տեսանկյունից բացասական հետևանքը անխուսափելի է, իսկ հետագայում վնասների վերացման համար պետբյուջեից լրացուցիչ ծախսեր կպահանջվեն։