Չինաստանը կրճատեց իրանական նավթի ներմուծումը

Չինաստանը, չնայած սպասումներին, կրճատեց իրանական նավթի ներմուծումը և դրա շնորհիվ երկիրը հիմա հնարավորություն ունի խուսափել ամերիկյան պատժամիջոցներից, որոնք կսկսեն գործել հունիսի 28-ից: «Դանդաղ, բայց հստակ քայլերով Չինաստանը ճիշտ ուղու վրա է»,- հայտնել է ԱՄՆ-ի պետքարտուղար Հիլարի Քլինթոնը:

Քլինթոնը հիշեցրեց, որ նա ստիպված է զեկուցել, թե որ երկրներն են կրճատել Իսլամական հանրապետությունից նավթի մատակարարումը: Հիշեցնենք, որ այն երկրներին, որոնք չեն կրճատի իրանական նավթի գնումը և կշարունակեն հաշիվ ունենալ Իսլամական Հանրապետության Կենտրոնական Բանկի հետ, սպառնում են արգելքներ Միացյալ Նահանգների հետ ցանկացած գործարքների նկատմամբ:

«Նախկինում իրանական նավթի ներմուծումը կրճատել են Ճապոնիան, Հնդկաստանը և Հարավային Կորեան: Դատելով վերջին տեղեկություններից՝ Չինաստանը շուտով նույնպես կընդգրկվի այդ երկրների ցուցակում»,- նշել է Քլինթոնը:

Ավելի վաղ Քլինթոնն արդեն հայտնել էր, որ Վաշինգտոնը որոշել է նոր պատժամիջոցներ չգործածել Թուրքիայի, Շրի-Լանկայի, Հարավային Աֆրիկայի, Թայվանի և Մալայզիայի դեմ, որոնք իրանական նավթի խոշոր ներմուծողներ են: Ամերիկյան պատժամիջոցներից կարող են խուսափել նաև Բելգիան, Լեհաստանը, Չեխիան, Իտալիան, Ֆրանսիան, Անգլիան, Իսպանիան, Հունաստանը, Նիդերլանդները և Գերմանիան:

Ստիպելով ուրիշ երկներին հրաժարվել իրանական նավթի գնումից՝ Վաշինգտոնը հույս ունի ուժ գործադրել Իրանի վրա, որպեսզի Իսլամական Հանրապետության ղեկավարությունը փոխի իր միջուկային ծրագրի ռազմավարությունը: