Սևանից ջրի բացթողումը դրական արդյունք է ունենալու. բնապահպանության նախարար

ՀՀ բնապահպանության նախարար Արամ Հարությունյանն այսօր լրագրողների հետ ճեպազրույցում, անդրադառնալով Սևանա լճից ջուր բացթողնելու հարցին, անհրաժեշտ համարեց ներկայացնել նախորդ հինգ տարիների ընթացքում Սևանի ջրի մակարադակի վերաբերյալ ցուցանիշները:

Նախարարի խոսքերով, 2007 թվականին Սևանա լճի լուրջ բարձրացում է արձանագրվել շուրջ 46սմ-ով: «2008-ը մեզ համար երշտային տարի էր համարվում և ԱԺ-ն որոշում կայացրեց շուրջ 302 մլն խմ ջուր բաց թողնել, սակայն այդ տարի ևս մենք ունեցանք դրական դինամիկա, այսինքն՝ կրկին ջրի ավելացում եղավ շուրջ 6 սմ-ով: 2009, 2010, 2011 տարիներին անվերապահորեն ունեցել ենք ջրի մակարդակի բարձրացում:

Եթե այս տարիների դինամիկան մենք նայենք և համադրենք այն Սևանի մասին օրենքի հետ, ապա Սևանի ջրի մակարդակը պետք է բարձրանա շուրջ 6.5 մետրով, այսինքն հասնի 1903.5 մետրի: Այսօր ուրախությամբ պետք է նշեմ, որ մենք 1900-ի շեմն արդեն իսկ անցել ենք: Մենք օրենքով սահմանված կարգով տարեկան 15-20սմ պետք է բարձրանայինք և այս տաս տարիների ընթացքում արդեն երեք մետր և ավելի բարձրացել է: Եվ նույնիսկ այն տարի, երբ մենք 302 մլն խմ ջուր ենք բաց թողնել, այդ տարին նույնպես դրական բալանսով ենք փակել:

Այս տարի Ջրային պետական կոմիտեի կողմից պահանջ է առաջացել. անհանգստություն են հայտնել, որ ջուրը, հնարավոր է, չբավարարի և դրա համար կա հատուկ ընթացակարգ և այդ ընթացակարգով շարժվել ենք առաջ», - նշեց Արամ Հարությունյանը: Նա ասաց նաև, որ բնապահպանական և էկոլոգիական տեսակետից, իրենց մասնագետների պնդմամբ, այս տարի ևս դրական արդյունքներ են լինելու: