Ուելսցիները Մեծ Բրիտանիայի հնագույն ժողովուրդն են

Օքսֆորդի համալսարանի պրոֆեսոր Փիթըր Դոնելին (Peter Donnelly) ենթադրում է, որ բրիտանական կղզիների հնագույն բնակիչները ուելսցիներն են։ Այս եզրահամգմանը նա եկել է Ալբիոնի (Բրիտանիայի մեկ այլ անվանումը - Ծ.Թ.) բնակիչների գենետիկ բազմազանության ուսումնասիրության արդյունքում, հաղորդում է BBC News-ը։

Հետազոտությունների նմուշները հավաքվել են բրիտանական բոլոր կղզիներից, պայմանով, որ կամավորների նախնիները մինչև տատ և պապ, ապրած լինեն նույն տարածքում։ Հաշվի է առնվել նաև բնակավայրերի հեռավորությունները մեծ քաղաքներից։ ԲԱցի գենետիկ նյութից, հետազոտողները քննել են նաև կամավորների նախնիների ազգանունները։

Պրոֆեսոր Դոնելիի խոսքերով, ուելսցիները, առաջին հերթին, գենետիկորեն զգալիորեն տարբերվում են Մեծ Բրիտանիայի մնացյալ բնակչությունից, և երկրորդը՝ ավելի սակավ են ենթարկվել դեպի այս կղզիները միգրացիայի ալիքներին։ Նրանց ԴՆԹ-ներում գիտնականները հայտնաբերել են այնպիսի գծեր, որոնք ցույց են տալիս ուելսցիների ազգակցությունը վերջին սառցակալման դարաշրջանի ավարտին Բրիտանական կղզիներ հասած հնագույն մարդկանց հետ։

Հետագա վերլուծությունը ցույց է տվել, որ հյուսիսային ուելսցիները տարբերվում են հարավայիններից։ Դոնելիի կարծիքով, այս երկու խմբերի նախնիները տարբեր տեղերից են գաղթել ներկա բնակության վայրեր, հյուսիսցիները՝ Իռլանդիայից, հարավցիները՝ հյուսիսային Ֆրանսիայից։ Իմիջիայլոց, նա նաև նշում է, որ այս տեղաշարժերի վերաբերյալ պատմագրական վկայություններ դեռևս գոյություն չունեն։

Ուելսցիների գենետիկ մեկուսացվածությունը, այն է՝ յուրահատուկ Y-քրոմոսումի առկայությունը, գիտնականը բացատրում է տեղանքի լեռնային ռելիեֆի առանձնահատկություններով, ինչը, ըստ նրա, թույլ չի տվել տեղի բնակչությանը զգալիորեն խառնվել հետագայում այստեղ տեղափոխված անգլերի, սաքսերի, յուտերի և այլ միգրանտների հետ։