Կվերականգնվի երկու արգելոց. բնապահպանության նախարար

Կառավարության այսօրվա նիստին հաջորդած ճեպազրույցի ընթացքում բնապահպանության նախարար Արամ Հարությունյանը պարզաբանումներ է տվել «Գոռավանի ավազուտներ» պետական արգելավայրի վերականգնման աշխատանքների 2013-2015թթ. ծրագրի և «Գերմանիայի և Հայաստանի միջև ֆինանսական համագործակցության. Բնապահպանական ծրագիր Հարավային Կովկասում՝ Հայաստանում Արփի լիճ Ազգային Պարկի ստեղծում» ծրագրի գործողությունների իրականացումը մինչև 2012 թվականի նոյեմբեր երկարաձգման մասին:

«Գոռավանի ավազուտները» Խոսրովի արգելոցի տարածքում է, և նախարարի ներկայացմամբ՝ արգելոցում գոյություն ունեցող խնդիրները հիմանականում վերաբերում են արգելավայրային ռեժիմին: Չկան անհրաժեշտ ենթակառուցվածքներ, և պետք է ավելի պատշաճ աշխատանքներ իրականացնել»: Նախարարը հայտնել է, որ «Գոռավանի ավազուտներում» պետք է իրականացվեն ցանկապատման, կենդանական և բուսական աշխարհի պահպանմանն ուղղված աշխատանքներ:

«Արփի լիճ» ազգային արգելոցն անդրսահմանային պահպանվող տարածք է, այսինքն դրա պաշտպանությունն իրկանացվում է նաև հարևան պետությունների հետ: «Դեռևս ծրագրի մեկնարկին մենք հայտարարել ենք, որ 2.2 մլն եվրո արժողությամբ ծրագիր ենք իրականացնում Գերմանիայի Դաշնության կառավարության հետ համատեղ»,- այսօր ասել է բնապահպանության նախարարը, ով ներկայացրել է նաև մինչ այժմ կատարված աշխատանքները՝ կառուցվել են այցելուների կենտրոն, Ազգային պարկի շենք, կատարվել են քարտեզագրման ու ակնադիտական աշխատանքներ: