Սա հարթակ էր, որտեղ ներկայացրինք մեր ցանկությունները

«Անկախ այն հանգամանքից, որ ճանաչված հանրապետություն է Արցախը, մենք բոլոր հնարավոր ֆորմատներն օգտագործում ենք, այդ թվում նաև Միացյալ նահանգներում՝ համագործակցության եզրեր գտնելու և մեր շահերն առաջ մղելու համար: Բացի նրանից, որ նախագահի մակարդակով հանդիպումներ եղան ԱՄՆ կոնգրեսականների հետ, նաև այլ կարևոր հանդիպումներ կան  նախատեսված: Միացյալ Նահանգներում գործող հայկական կազմակերպությունների հետ ակտիվ աշխատանքներ են տարվում ինչպես Ցեղասպանության ճանաչման, այնպես էլ Արցախի ճանաչման մասով: Օրակարգը բավականին ընդգրկուն է և հանդիպումների մի մասն արդեն կայացել է»,- այս մասին ԼՈւՐԵՐ.com-ի թղթակցի հետ զրույցում ասաց Արցախի նախագահի խորհրդական Տիգրան Աբրահամյանը՝ անդրադառնալով օրերս ԱՀ նախագահ Բակո Սահակյանի գլխավորությամբ Արցախի պատվիրակության վաշինգտոնյան այցին:

Նշենք, որ սա Բակո Սահակյանի առաջին ելույթն էր Կապիտոլիումում: Խոսելով նախագահի ելույթի մասին, Նախագահի խորհրդականը նկատեց, որ սա մեզ համար հնարավորություն էր՝ ներկայացնելու մեր մոտեցումը այդքան կարևոր հարթակում. «Նախագահը հնարավորություն ունեցավ ներկայացնելու և՛ Արցախի զարգացման հիմնական ուղղությունները, և՛ արտաքին քաղաքական օրակարգի ուղղություններն ու սկզբունքները: Այսինքն՝ սա հարթակ էր, որի միջոցով մենք հիմնական հարցերի շուրջ ներկայացրինք մեր ցանկությունները»,- ասաց նա:

Նրա խոսքով՝ այս պահին հանդիպում ունենալը որևէ գործոնով պայմանավորված չէր. «Նախագահ Սահակյանի այցերը տարբեր երկրներ կայանում են տարբեր ֆորմատներով, ինչպես նաև տարբեր երկրների ներկայացուցիչների այցերը Արցախ: Այս այցը նույնպես ինչ-որ առանձնահատկություն չուներ և որևէ բանով պահմանավորված չէր: Այդպես է հարմար եղել, այդպես է պլանավորվել»:

Սովորաբար, նման այցերի ժամանակ միշտ լինում են հայտարարություններ, ներկայացվում են հակամարտության խնդիրները, բայց, ըստ էության, դրանք տեսական են մնում: Կարո՞ղ ենք ասել, որ Բակո Սահակյանի այցը միտված է նաև գործնական առումով փոփոխություններ բերելու՝ դիտարկմանն ի պատասխան Աբրահամյանն ասաց՝ այն, որ մենք հնարավորություն ունեինք ներկայացնելու մեր մոտեցումները՝ ենթադրում է, որ մենք ցանկանում ենք համագործակցությունների նոր հորիզոններ բացել:

Նշենք, որ այս օրերին Ադրբեջանում բողոքի ալիք էր բարձրացրել՝ Բակո Սահակյանի՝ ԱՄՆ այցի հետ կապված: Անդրադառնալով այս հանգամանքին՝ Աբրահամյանը նշեց. «Դա արդեն օրինաչափություն է դարձել: Նման դեպքերում Ադրբեջանը փորձում է խոչընդոտներ ստեղծել: Բայց ինչպես այս, այնպես էլ շատ դեպքերում, դա որևէ ազդեցություն չի ունենում ո՛չ հանդիպումների, ո՛չ էլ օրակարգի վրա»,- ասաց նա՝ ավելացնելով, որ անկախ ամեն ինչից՝ մեր պետական շահերը ներկայացնելու ճանապարհին նմանատիպ այցեր դեռ շատ կլինեն և Արցախն էլ դեռ առիթներ կունենա տարբեր ֆորմատներով և հանդիպումներով ներկայացնել և առաջ մղել իր շահերը:

Սոնա Հարությունյան