«Հրապարակ». Նոր տնօրեն «Կենտրոն» հեռուստաընկերությունում

Ընդամենը մի քանի օր առաջ «Կենտրոն» հեռուստատեսության այսօր արդեն նախկին տնօրեն Սերգեյ Ադումյանը հերքել էր թերթի տեղեկությունն իրեն աշխատանքից ազատելու մասին և, ակնհայտորեն չափազանցնելով իր դերը «Կենտրոնի» գործունեության մեջ, շեշտել էր. «Հեռուստաընկերությունը շարունակում է իր բնականոն աշխատանքը»:

Թերթը նշում է, որ նրա տոնն այնքան համոզիչ էր, որ իրենք մտածել են՝ հավանաբար սեփականատերը որոշել է նրան առայժմ պահել, հնարավորություն ընձեռելով փոխհատուցելու ստուդիային պատճառած նյութական վնասները: Բայց շաբաթը ուրբաթից շուտ եկավ: Օրերս հեռուստատեսությունում ժողով է եղել: Կոլեկտիվին ներկայացրել են նոր գործադիր տնօրենին, և հայտարարվել է, որ Սերգեյ Ադումյանը մի քիչ հոգնել է, նրան աշխատանքից չեն ազատում, բայց թող հանգստանա: Միաժամանակ աշխատողներին հրահանգվել է, որ որևէ հարցով նրան չդիմեն: Տնօրենի ընդարձակ աշխատասենյակից, որը գտնվում է երկրորդ հարկում, նրան տեղափոխել են ներքևի հարկի նեղլիկ սենյակներից մեկը: Ավելի վաղ հեռուստատեսության սեփականատիրոջ հրահանգով ստուգվել է բուֆետը, որն աշխատեցնում էր Ադումյանի աներորդին՝ Տիգրան անունով: Հաշվարկների արդյունքում պարզվել է, որ այն վնասով էր աշխատում: Տիգրանին ևս ազատել են: Այս տեղեկությունները ստացանք հեռուստատեսության խոհանոցին մոտ կանգնած անձանցից: Աշխատողները հիշում են Սերգեյի Նոնա անունով քարտուղարուհուն, որին Սերգեյն անսահման իշխանություն էր տվել, ապա քարտուղարուհուց դարձրել փոխտնօրեն: Նա ևս ազատված է աշխատանքից: