Այդպիսին է եղել գյուղական համայնքների հանրային պահանջը. Նաիրա Զոհրաբյանը Սևանա լճի օրինագծին կողմ քվերակելու մասին

Մենք կողմ ենք քվերակել «Սևանա լճի մասին» եւ «Սևանա լճի էկոհամակարգի վերականգնման, պահպանման, վերարտադրման եւ օգտագործման միջոցառումների տարեկան եւ համալիր ծրագրերը հաստատելու մասին» ՀՀ օրենքներում լրացումներ կատարելու նախագծին, որովհետև այդպիսին է եղել գյուղական համայնքների ձևակերպած հասարակական հանրային պահանջը: Այս մասին Լուրեր.com-ի հետ զրույցում ասաց «Բարգավաճ Հայաստան» խմբակցության քարտուղար Նաիրա Զոհրաբյանը:

«Տարբեր գյուղացիական համայքների ներկայացուցիչները մեզ հետ հանդիպման ժամանակ պնդել են, որ այսօր ոռոգման ջրի լրջագույն խնդիր կա, սակավաջրություն: Իրենք՝ սպառողներն են հորդորել, ձևակերպել պահանջ ԲՀԿ-ի առջև՝ կողմ քվեարկել այդ նախագծին»,- նշեց Զոհրաբյանը՝ հավելելով, որ հանդիպում են ունեցել Արագածոտնի, Լոռու, Սյունիքի, Տավուշի, Արարատի մարզերի գյուղական համայնքների ներկայացուցիչների հետ:

Նա տեղեկացրեց, որ հանդիպումներ են ունեցել նաև բնապահպանական կազմակերպությունների հետ: Նաիրա Զոհրաբյանի պնդմամբ՝ բնապահպանների կարծիքը միանշանակ չի եղել:

«Եղել են բնապահպանական կազմակերպություններ, որոնք միանշանակորեն պնդում են, որ բնապահպանական խնդիր կարող է առաջանալ, բայց մի շարք կազմակերպություներ ևս, որոնց ներկայացուցիչների հետ մենք հանդիպել ենք, ասել են, որ Սևանի մակարդակն այսօր այնքան է, որ տվյալ քանակությամբ ջուր բաց թողնելը որևէ բնապահպանական խնդիր առաջացնել չի կարող»,- ասաց Զոհրաբյանը:

ԲՀԿ քարտուղարի համոզմամբ՝ եթե ոռոգման ջրի հարցը չլուծվեր, ապա մարդիկ ուղղակիորեն մատնվելու էին սովի, «ստիպված էին լինելու համալրել երկիրը շարնեշարան լքողների շարքը»: Միաժամանակ տիկին Զոհրաբյանը խոստովանում է, որ հասկանում ու հարգում է բնապահպանական այն կազմակերպությունների կարծիքը, որոնք ահազանգում են, «որովհետև Սևանի հետ կապված մենք լրջագույն խնդիրներ ունենք»: Մեր հարցին, թե մտավախություն չունեի՞ք նախագծին կողմ քվերակելով հակասական գնահատականների արժանանալ, Զոհրաբյանը պատասխանեց.

«Ո՛չ, որովհետև մենք քվեարկել ենք՝ լսելով մեր համակիրների և մեզ ձայն տված ժողովրդի ձայնը: Եթե իրենք ասեին, որ չկա դրա անհրաժեշտությունը, վստահ եղեք՝ մենք որևէ խնդիր չունեինք դեմ քվերկելու»: