Հարցում. Ի՞նչ պետք է անի Տարոն Մարգարյանը Երևանի և երևանցիների համար (Տեսանյութ)

Ավանի նախկին թաղապետ, այժմ արդեն Երևանի քաղաքապետ Տարոն Մարգարյանն եռանդով ու ապագայի նկատմամբ դրական տրամադրվախությամբ օրերս ստանձնեց իր պաշտոնը։ Ոգևորությունը մեծ էր թե՛ նրա հորը հարգող ու սիրող մարդկանց, թե՛ Ավանի բնակիչների շրջանում։

Իսկ ի՞նչ են մտածում քաղաքի սովորական անցորդները, ի՞նչ ակնկալիքներ ունեն նրանք Տարոն Մարգարյանից։ Այս թեմայով ԼՈՒՐԵՐ.com լրատվական կայքի լրագրողը կատարեց փոքրիկ հարցում՝ քաղաքի բնակիչների շրջանում։

Կարծիքները տարբեր էին՝ թե՛ դրական, թե՛ բացասական, թե՛ անտարբեր։ Սակայն գերակշիռ մասը հավատացած է, որ բարեփոխումներ անպայման լինելու են։

Հարցմանը մասնակցողների կեսից ավելին ընդհանրապես տեղյակ չէր, թե ո՞վ է քաղաքապետը, և որ եղել է նոր նշանակում։ Ոմանք ասացին, որ իրենց համար «դրանք բոլորն էլ մեկ են»։ Իսկ ուրիշները նշեցին, որ իրենց համար միևնույն է, թե ով է Երևանի քաղաքապետը։

Հարցմանը մասնակցողների գերակշիռ մասը կարծում է, որ Անդրանիկ Մարգարյանի որդին չի կարող վատ քաղաքապետ, վատ ղեկավար լինել։ Մյուս մասը համարում է, որ այն, ինչ արել է նա Ավանում, կշարունակի անել ողջ քաղաքում։

Հարկ ենք համարում նշել, որ դժգոհություններ նկատվեցին ավելի շատ առևտրական մասսաների շրջանում։ Վերջիններս դեմ են փողոցային առևտրի կասեցմանը և համարում են, որ ինչ էլ անեն, դա շարունակվելու է, քանի որ դա ոմանց ապրուստի միակ միջոցն է։ Բացի այդ, նրանց խոսքով՝ աշխարհի բոլոր ծայրերում թույլատրված է փողոցային առևտուրը. ինչու՞ են մեր Հայաստանում դա փորձում արգելել։