Կողմ քվեարկելով՝ որևէ երաշխիք չունենք, որ կոռուպցիոն ռիսկեր չեն լինելու. Նաիրա Զոհրաբյան

Սևանա լճի վերաբերյալ օրինագծերին կողմ քվեարկելու տրամաբանությամբ առաջնորդվելով՝ մենք կողմ ենք քվեարկել նաև Ասիական զարգացման բանկից վարկ վերցնելու նախագծին: Այս մասին Լուրեր.com-ին հայտնեց ԲՀԿ խմբակցության քարտուղար Նաիրա Զոհրաբյանը:

«Մենք ընդհանրապես պատրաստվում էինք հանդես գալ խորհրդարանում առաջարկով՝ ժամանակավորապես մորատորիում հայտարարել որևէ նախագծի վրա, որը կնախատեսի նորից վարկ վերցնել, որովհետև այն արտաքին պատքը, որի տակ այսօր կքած է Հայաստանը, ուղղակիորեն մեզ արգելում է մտածել վարկ վերցնելու մասին»,- ասաց Զոհրաբյանը:

Նրա փոխանցմամբ՝ ինչպես Սևանա լճին վերաբերող, այնպես էլ Ասիական զարգացման բանկից վարկ վերցնելու օրինագծին կողմ քվեարկելուց առաջ հանդիպել են գյուղացիական համայնքի ներկայացուցիչների հետ:

«Մեզ տարան, ցույց տվեցին Արագածոտնի մարզի Հնաբերդ, Ալագյազ գյուղերում ինչ վիճակում են ջրահեռացման խողովակները՝ կոռոզիայի ենթարկված, փտած: Ասացին, որ եթե այս ջրահեռացման խողովակները չվերանորոգվեն, ապա ամբողջ համակարգն է փլուզվելու»,- նշեց Զոհրաբյանը:

Նրա խոսքով՝ իրենք հասկանում են, որ կողմ քվեարկելով որևէ երաշխիք չունեն, որ կոռուպցիոն ռիսկեր չեն լինելու, թափանցիկության, վերահսկողական մեխանիզմները տեսանելի չեն լինելու:

«Մենք առաջնորդվել ենք չարյաց նվազագույնի տարբերակով: Ինչքան էլ գողանան այդ վարկից, ինչ-որ բան այդուհանդերձ հասնելու է, ինչպես օրենքն է նախատեսում, 18 քաղաքային ու 32 գյուղական համայնքներին, և ինչ-որ չափով գոնե հնարավոր կլինի վերականգնել ջրահեռացման խողովակները»:

Հիշեցնենք, որ երեկ ԱԺ-ում ԲՀԿ-ն կողմ քվեարկեց ՀՀ կառավարության և Ասիական զարգացման բանկի միջև 40 միլիոն դոլարի վարկային համաձայնագրին, որը բանկը Հայաստանի տրամադրում է ջրամատակարարման ոլորտում ներդնելու համար: