Միանշանակ չեմ կարող ասել՝ Սևանա լճին վերաբերող նախագծին կողմ քվեարկելը ճի՞շտ է, թե ճիշտ չէ. Հրանտ Սարգսյան

Լուրեր.com-ի հետ զրույցում այսօր «Բարգավաճ Հայաստան» խմբակցության քարտուղար Նաիրա Զոհրաբյանը հայտնել էր, որ Սևանա լճի վերաբերյալ օրինագծերին կողմ քվերակելուց առաջ հանդիպել են գյուղացիական համայնքի ու բնապահպանական կազմակերպությունների ներկայաչուցիչների հետ: Մեր հարցին, թե ո՞ր կազմակերպությունների հետ են հանդիպել, տիկին Զոհրաբյանը մասնավորապես նշեց «Տապան» էկոակումբն ու Սպառողների ասոցիացիան: Նաիրա Զոհրաբյանը մեզ հետ զրույցում ասել էր, որ բնապահպանների կարծիքները միանշանակ չէին: 

Մենք կապվեցինք «Տապան» էկոակումբի նախագահ Հրանտ Սարգսյանի հետ: Նա ասաց, որ հանդիպման չի մասնակցել, սակայն իր կարծիքը հայտնել է հեռախոսով:

«Միանշանակ չեմ կարող ասել՝ կողմ քվեարկելը ճիշտ է, թե ճիշտ չէ, որովհետև ինքս հավաստի տեղեկություններ չունեմ, որ ջրամբարները իսկապես դատարկ են: Դրանք շատ լուրջ հաշվարկներ են: Ջրային տնտեսության հետ աշխատելը շատ լուրջ խնդիր է: Ես մասնագետ չեմ, մասնագետների կարծիքն է պետք: Հարկավոր է հետևել այդ ամենին ինչին՝ ով է հետևելու, ում վրա է դրվելու այդ խնդիրը»,- նշեց Սարգսյանը՝ հավելելով, որ խնդիրը միանշանակ չէ:

Սպառողների ասոցիացիայի նախագահ Մելիտա Հակոբյանն էլ Լուրեր.com-ի հետ զրույցում նույնպես ասաց, որ քննարկման չի մասնակցել, հրավեր չի եղել, բայց հեռախոսով կարծիքն ասել է:

«Եթե ազգաբնակչությունը պետք ունի ջրի, պիտի տալ: Դա եկամուտներ կապահովի, բացի դրանից գյուղատնտեսական ապրանքներ են, որ մեր ազգաբնակչության համար շատ կարևոր են: Ամենկարաևորը՝ պետք է մտածել ջրամբարներ կառուցելու մասին, ոչ թե թողնել՝ ջուրը ուրիշ երկրներ գնա: Մեր ազգաբնակչությանը կերակրում ենք, հո չե՞նք թողնի սոված մնա»,- եզրափակեց տիկին Հակոբյանը: