Շոտլանդացու տանը գտնվել է Ռեմբրանդտի անհայտ նկարը

Ռեմբրանտի՝ նախկինում անհայտ նկար է հայտնաբերվել Շոտլանդիայի տներից մեկում, հայտնում են բրիտանական լրատվամիջոցները։

Փորձագետները հաստատել են նկարի իսկությունը, որի վրա պատկերված է մի կույր մուրացկան՝ տղայի և շան հետ: Ընդ որում, անսպասելի գտածոն հաստատել է ականավոր վարպետին վերագրված, Բեռլինի թանգարաններից մեկում պահվող նմանատիպ գործի բնօրինակի պատճեն լինելը:

Տան տերը, հայտնաբերելով նկարը իր պահարանում, անմիջապես կապ է հաստատում Christie's աճուրդի տան փորձագետների հետ։ Գտածոյի առաջին լուսանկարների ստացումից հետո ոչ մի կասկած չի մնացել նկարի պատկանելության մասին։ Բացի դրանից, նրանց մոտ շփոթմունք էր առաջացրել Բեռլինի փորագրության գրասենյակի հավաքածուում և թանգարանի ցանկում ընդգրկված նույնատիպ սյուժե ունեցող նկարը։

«Սովորաբար, եթե թանգարանում գտնվում է նմանատիպ նկար, ապա գտածոն կարող է լինել կրկնօրինակ, սակայն էսքիզը տեսնողների համար միանգամայն պարզ էր, որ սա իրական Ռեմբրանդտ է, իսկ Բեռլինում գտնվող աշխատանքը՝ պատճեն», - ասել է Հին վարպետների նկարների վարչության պետ Բենջամին Փերոնեթը։ Տան տերը ձեղնահարկում հայտնաբերել էր նաև 5 այլ նկար ևս։ Ըստ փորձագետների՝ դրանք Ռեմբրանդտի աշակերտների աշխատանքներն են։

Բոլոր գործերը կներկայացվեն հուլիսի 3-ին կայանալիք Christie's աճուրդում:

Նկարի սկզբնական գինը 125 հազար դոլար է:

Թե ինչպես է հոլանդացի նկարչի աշխատանքը հայտնվել շոտլանդացու տանը, պարզ չէ։

Սեփականատերը հայտարարել էր, որ նույնիսկ չէր էլ կասկածում իր պահարանում արվեստի նման թանկարժեք գործի գոյության մասին։