Նրանք վստահ են եղել, որ կարող են մարդ ծեծել, և ազատության մեջ մնալ. Արմեն Գրիգորյան

Համացանցում տարածված տեսանյութում ես տեսա, որ թիկնապահը Ռուբեն Հայրապետյանի հետ է: Իսկ դա նշանակում է, որ թիկնապահը ինչ-որ կապեր ունի Հայրապետյանի հետ: Հենց այսքանով էլ Ռուբեն Հայրապետյանն առնչվում է «Հարսնաքարի» միջադեպի հետ: Նման կարծիք Լուրեր.com-ի հետ զրույցում հայտնեց «Ժողովրդավարություն հանուն զարգացման» ՀԿ նախագահ Արմեն Գրիգորյանը:

Նա հավելեց նաև, որ Հայրապետյանը հենց գործողություններում գուցե անմիջական պատասխանատվություն չունի, բայց պատասխանատվության զգացումը պետք է կապել իր հետ:

«Նրանք վստահ են եղել, որ կարող են մարդ ծեծել, և ազատության մեջ մնալ կամ պաշտպանված լինել: Իսկ նման երևույթ երկար ժամանակ է, ինչ առկա է»,- ասաց Գրիգորյանը:

Անդրադառնալով «Պահանջում ենք պատժել «Հարսնաքարում» տեղի ունեցածի բոլոր մեղավորներին» ֆեյսբուքյան նախաձեռնության հետագա քայլերին, Գրիգորյանը նշեց, որ հասարակությունն այսօր ավելի ակտիվ է դարձել և ավելի մեծ պատասխանատվություն է ձեռք բերել երկրում արդարություն հաստատելու գործում:

«Պետական ինստիտուտները համապատասխան  գործառույթներ գրեթե չեն կատարում կամ կատարում են, երբ հասարակությունն է պահանջում: Իսկ հասարակության նման գործողությունները շատ կարևոր են և պետք է շարունակական լինեն, որ կարողանանք այսպես ասած ստիպել պետական ինստիտուտներին կատարել իրենց գործառույթները»,- ասաց Գրիգորյանը: