Ագաթա Քրիստիի նվիրած ծխախոտատուփը վաճառքի է հանվել

Լոնդոնում Sotheby's աճուրդի տան կողմից վաճառքի է հանվել բրիտանացի գրող Ագաթա Քրիստիի՝ սաքսոֆոնահար Բոբ Լիմինգին նվիրած ծխախոտի արծաթե տուփը, հայտնում է Daily Mail-ը։

1926 թվականի դեկտեմբերին Քրիստիի առաջին ամուսին Արչիբալդը խոստովանում է ամուսնական անհավատարմության մասին և ապահարզան պահանջում: Գրողի հոգեկան վիճակի վրա ազդում է նաև մոր մահը: Քրիստիի մոտ նյարդային պոռթկում է տեղի ունենում: Նա ժամանակ առ ժամանակ սկսում է մոռանալ իր անունը: Դեկտեմբերի սկզբին Քրիստին տանից դուրս է գալիս ու անհետանում: Չնայած նրա որոնողական աշխատանքներում ընդգրկված էին 500 ոստիկաններ, շներ, նույնիսկ օդանավ, Քրիստիին հաջողվում է գտնել 11 օր անց: Առաջինը Քրիստիին նկատել է սաքսոֆոնահար Լիմինգը: Նրա «փախուստը» ուղեկցվել է ամնեզիայով (հիշողության կորուստ)։ Ի նշան երախտագիտության՝ Քրիստին երաժշտին է նվիրում ծխախոտի արծաթե տուփը՝վրան գրված «Ամենալավ ցանկություններով երկրպագուից և տիկին Քրիստիից»։

Ծխախոտատուփը Լիմինգի ընտանիքում փոխանցվել է սերնդից սերունդ: Լոտի մեկնարկային գինը 10 հազար ֆունտ է (15.5 հազար դոլար): Աճուրդը տեղի կունենա հուլիսի 10-ին:

Ագաթա Քրիստին Մեծ Բրիտանիայի խորհրդանիշներից մեկն է: Նա դասվում է դետեկտիվ ժանրի աշխարհում ամենահայտնի հեղինակների շարքին: Նրա գրքերը ամենահրատարկվողներն են՝ Աստվածաշնչից և Շեքսպիրի երկերից հետո: Նրա ստեղծագործությունները թարգմանվել են ավելի քան 100 լեզուներով։ 1979թ-ին ռեժիսոր Մայքլ Էփթեդի կողմից նկարահանվել է գրողի կյանքի դեպքերին նվիրված ֆիլմ։