Արցախի ճանաչումը Հայաստանին միավորվելու քայլերից է. Վիտալի Բալասանյան

Lurer.com-ը զրուցել է Արցախում նախագահական ընտրություններում իր թեկնածությունն առաջադրած Վիտալի Բալասանյանի հետ,  եւ տեղեկացել  քարոզարշավի ընթացքի մասին:

Պարոն Բալասանյան, ինչպե՞ս է ընթանում քարոզարշավը, գործում են արդյո՞ք նախընտրական շտաբներ, և ի՞նչ միջոցներ եք ձեռնարկում ընտրազանգավածին ձեր ծրագրերը հասանելի դարձնելու համար։

Իմ քարոզարշավն ընթանում է բավականին ակտիվ, հանդիպումներ ունենում եմ թե՝ շրջաններում, թե՝ Ստեփանակերտի տարբեր թաղերում և հիմնարկներում: Նախընտրական շտաբներ ունենք թե մայրաքաղաքում, թե տարբեր բնակավայրերում: Չնայած սրան՝ նախընտրական շտաբները մեծ դեր չեն խաղում: Մենք առավել մեծ դերակատարություն ենք տալիս քարոզչական խմբերին, որոնք մեծ ակտիվությամբ աշխատում են թաղերում, գյուղերում, փոքր քաղաքներում: Քարոզչական մի շարք նորամուծություններ ևս ունենք, որոնք մարտավարական նկատառումներից ելնելով, դեռևս չենք բացահայտի: Բացի այդ ակտիվ ենք համացանցում, որտեղ գործում է իմ կայքը, էջեր կան տարբեր սոցիալական ցանցերում:

 Նախընտական ծրագիրն ի՞նչ ոլորտներ է ներառում, ի՞նչի վրա է դրված շեշտը։

Նախընտրական ծրագիրի գլխավոր մասն են կազմում անվտանգությունը, պաշտպանությունն և սոցիալ-տնտեսականը: Պաշտպանության և անվտանգության ապահովման մեջ կարևորում եմ բանակում բարեփոխումները, մասնավորապես սահմանագծի ամրապնդումը, թշնամու կողմից մեր զինվորի խոցելիության բացառումը, պատերազմի ավարտը:

Այսօր էլ զինվորներ են զոհվում դիրքային պատերազմի հաշվին, ինչը անթույլատրելի է: Արտաքին քաղաքականության մեջ կարևորում եմ Արցախի միջազգային ճանաչման իրական գործընթացի սկսելը: Արցախի ճանաչումը մեզ համար Հայաստանին միավորվելու քայլերից է: Կարևոր է Արցախի վերադարձը բանակցային ձևաչափ, ինչը ես տեսնում եմ Արցախյան հակամարտության գծով ՀՀ և ԼՂՀ միջև հստակ դերաբաշխությամբ:

Սոցիալ-տնտեսական բլոկում առաջնային է թոշակների և նպաստների բարձրացումը, դրանք պետք է առնվազն հավասար լինեն սոցիալական զամբյուղի չափին: Մեր բյուջեն դա թույլ է տալիս անել, հարկավոր է միայն արդյունավետ բաշխել այն՝ զերծ մնալով պետական շռայլումներից: Առանցքային հարցերից է երկրի համաչափ զարգացումը, գյուղական կայացած ենթակառուցվածքների ստեղծումը՝ ճանապարհից սկսած մինչև գերարագ համացանց: Մեր նպատակներից է տեղական և արտաքին ներդրումների ներգրավման միջոցով  արտադրության ու ծառայությունների խրախուսումն է:

 Հանդիպում եք արդյո՟ք խոչընդոտների քարոզարշավի ընթացքում։

Քարոզարշավի ընթացքում խոչընդոտների չեմ հանդիպել: Օրեր առաջ Բակո Սահակյանի շտաբի պետ ԼՂՀ վարչապետ Արայիկ Հարությունյանը զրույցի ընթացքում վստահեցրել է, որ ինքը անձամբ զգուշացրել է բոլոր գերատեսչությունների, ուժային կառույցների, շրջանների վարչակազմերի ղեկավարներին, որպեսզի հետևեն օրենքի գերակայությանը: Մեր շտաբի համակարգողին հավաստիացրել են, որ կպատժվեն ընտրական գործընթացը խախտողները, կպատժվեն օրենքի ողջ խստությամբ: