Ինչո՞վ ենք պակաս վրացիներից. ՀՀ քաղաքացիներն ահազանգում են մաքսատնից

Այսօր առավոտյան, Լուրեր.com-ի խմբագրություն է ահազանգել մի քաղաքացի, ով հայտնել է, որ Բագրատաշենի մաքսակետում մաքսատան ծառայողներն առանց պատճառի խցանում են առաջացրել:

Այս կապակցությամբ Լուրեր.com-ի թղթակիցը շտապ մեկնել է հայ-վրացական սահմանում գործող մաքսատուն: Քիչ առաջ կապ հաստատեցինք լրագրողի հետ եւ ծանոթացանք մանրամասներին։

Վրաստանից Հայաստան մտնող մեքենաների մեծ կուտակում կա, մոտ 40 մեքենա շարված են մաքսատան մոտ: Լուրեր.com-ի թղթակիցը խոսել է քաղաքացիների հետ, որոնց պնդմամբ ձգձգումներն արհեստական են։ Նրանցից մեկը լրագրողին ասել է. «Մայրս սրտի հիվանդ է, մոտակա գյուղում ենք ապրում, բայց չենք կարողանում ազատվել էս վիճակից, որ շտապ տուն հասնենք, պետք է շտապ դեղորայք ընդունի»:

Վարորդների մեծ մասը հավաստիացրին, որ հարեւան Վրաստանի մաքսակետում ստուգումներն անցնում են արագ եւ խցանումներ չեն առաջանում, իսկ նրանցից մեկը հավելեց, թե. «Խնդրում եմ էս մասին գրեք, բարձրաձայնեք, թող պատասխանատու պաշտոնյաները լուծում տան խնդրին: Թող պատասխանեն՝ Էդ ո՞նց եղավ, որ Վրաստանում կարողանում են արագ ստուգումներ անել, նման խնդիրներ չստեղծել, իսկ Հայաստանի մաքսատանն էսքան պահում են, ինչո՞վ ենք պակաս վրացիքից»:

Մեկ ուրիշը բարկացած ավելացրեց. «Մարդ զզվել է սրանցից, ուզում ենք թողենք գնանք ու հաստատ գնալու ենք, որովհետև համբերության բաժակը մինչև վերջ լցվել է արդեն, մինչեւ ե՞րբ պետք է հանդուրժենք էս վիճակը, մենք հո սրանց ճորտը չե՞նք։ Ուզածներս մեծ բան է՞... Էդ ո՞նց է, որ Վրաստանը կարողացավ լուծել էդ խնդիրները, իսկ մենք տեղում դոփում ենք... Ասում են՝ արտագաղթ է, բա հենց սենց բաների համար են թողում գնում, է՛լի, մարդ մի կյանք է ապրում, ուզում է նորմալ ապրել, մենք աշխատող մարդիկ ենք, ողորմություն չենք խնդում, թող պայմաները գոնե արհեստական չծանրացնեն։ Մենք մեր մաքսատուրքը կտանք, հարկերն էլ հետը։»

Մեկ այլ վարորդ մեր հետ զրույցում նշեց, որ գոյություն ունի այլ խնդիր ևս։ Հարեւան Վրաստանում ուղեւորները չեն իջնում մեքենայից, իսկ Հայաստանում վարորդից բացի բոլորն իջնում են՝ երեխաները, մայրերը, ծերերը արեւի տակ սպասում են, մինչեւ մեքենաների ստուգումը վերջացնեն։ Սրան էլ է պետք վերջ տալ: