Ավարտվեց «Բացօթյա ընթերցանության փառատոնը»

Այսօր «Բացօթյա ընթերցանության փառատոնի» վերջին օրն էր: Երիտասարդները չնայած անձրևային եղանակին ժպտալով շտապում էին սկսել ընթերցանությունը: Ժամը 16:00-ին նրանք Երգի Պետական Թատրոնից շարժվեցին «Լունապարկ» և սկսեցին ընթերցանությունը: Այնտեղից գնացին Սարյանի այգի, շրջեցին քաղաքի տարբեր մասերում և քարոզեցին սիրել գիրքն ու միշտ զբաղվել ընթերցանությամբ:

«Ֆլեշմոբ Դիվիզիա» Հ/Կ խորհրդի անդամ Արամ Գրիգորյանը Լուրեր.com-ի լրագրողի հետ զրույցում ասաց հետևյալը. «Այսօր «Բացօթյա ընթերցանության փառատոնի» 4-րդ օրն է, և մենք իրականացնում ենք ընթերցանությամբ շրջագայություն Երևանով: Սրանով ուզում ենք հասարակությանը կոչ անել որքան հնարավոր է շատ գիրք կարդան անկախ նրանից, թե որտեղ են գտնվում: Այս 4 օրերի ընթացքում մենք ստացանք շատ ավելի լավ արդյունք, քան նախատեսել էինք: Արձագանքները շատ էին: Այս տարի փառատոնն իրականացրինք «Երևանը՝ գրքի մայրաքաղաք»-ի շրջանակներում՝ Մշակույթի նախարարության աջակցությամբ: Ուրախալի է, որ այս 4 օրերի ընթացքում ոչ մի անախորժություն չեղավ, և ընթերցասերները մեծ հաճույքով կարդացին իրենց գրքերը»:

Փառատոնի մասնակիցներից Սահակյան Աստղիկը պատմեց հետևյալը. «Առաջին տարին է, որ մասնակցում եմ «Բացօթյա ընթերցանության փառատոնին», սակայն մինչ մասնակցելը գնացել եմ տարբեր մարզերում շրջագայության: Ուրախ եմ, որ երիտասարդները մասնակցում եմ նման միջոցառումների և կրկնակի ուրախ եմ, որ բացի նրանցից գիրք ընթերցելու են գալիս նաև պապիկները, փոքրիկ երեխաները: 2 օր առաջ «Մանուկները և ընթերցանությունը» խորագրով միջոցառման ժամանակ փոքրիկները մեզ համար հեքիաթներ կարդացին, ինչն իրոք հրաշալի էր:
Անցորդներից ոչ ոք չէր կարողանում անտարբեր անցնել ընթերցասերների կողքով: Նրանցից մեկը՝ Անուշիկը, նույնպես ցանկացավ մասնակցել միջոցառմանը և ոգևորված հիշեց իր վերջին կարդացած գիրքն ու սկսեց պատմել բովանդակությունը»:

Միջոցառման ընթացքում մասնակիցները ընթերցեցին գրքեր ու խաղացին բազմաթիվ խաղեր: Փառատոնն ավարտվեց Անգլիական այգում: