Գալապագոսյան վերջին հսկա կրիան այլևս չկա

Գալապագոսյան հսկա կրիաների Geochelone abingdoni տեսակի վերջին ներկայացուցիչը՝ 100-ամյա Միայնակ Ջորջը, հունիսի 24-ին, կիրակի օրը, կնքել է իր մահկանացուն, հաղորդում է Reuters-ը։

Միայնակ Ջորջին, որն արդեն չէր կարողանում շարժվել, հայտնաբերել է ազգային պարկի աշխատակիցներից մեկը։ Նա համարվում է աշխարհի ամենահազվագյուտ կենդանին և վերջինն էր իր տեսակում։

Կրիայի մահվան հանգամանքները և պատճառները դեռևս պարզված չեն և հայտնի կդառնան հերձումից հետո։ Ենթադրվում է, որ Geochelone abingdoni տեսակի կրիաները կարող են ապրել մինչև 200 տարի։

Միայնակ Ջորջը հայտնաբերվել էր 1972 թվականին գալապագոսյան Պինտա կղզում։ Գիտնականները մոտ 20 տարի նրանից սերունդ ստանալու անհաջող փորձեր էին կատարում՝ որպես էգ վերցնելով մոտիկ, սակայն այլ ցեղատեսակի կրիաների։

Գալապագոսյան հսկա կրիաների այս վերջին ներկայացուցիչը համաշխարհային ճանաչում էր ստացել և դարձել է Գալապագոսյան ազգային պարկի խորհրդանիշը։ Համաշխարհային մի շարք հայտնի մարդիկ, այ թվում՝ արքայազն Չարլզը, հատուկ գալիս էին նրան տեսնելու։