«Երկիր». Քաղաքը վերածվում է շտաբի

«Երևանի քաղաքապետի պաշտոնում Տարոն Մարգարյանի առաջին որոշումներից մեկը զբաղեցրած պաշտոնից Արաբկիր վարչական շրջանի ղեկավար Էդուարդ Մուշեղյանին (Կյաժ Էդո) ազատումն է:

Մուշեղյանը պաշտոնանկ է արվել երեկ: Երբ Կարեն Կարապետյանը նշանակվեց Երևանի քաղաքապետ, նա անմիջապես պաշտոնին նշանակեց Էդուարդ Մուշեղյանին, որը թեև հանրապետական չէր, ինչը, սովորաբար, խանգարում է նման պաշտոն ստանալուն, սակայն իր մանկության ընկերն էր:
Ըստ մեր ունեցած տեղեկությունների, վարչական շրջանի ղեկավար է նշանակվելու Մուշեղյանի տեղակալը՝ Հրայր Անտոնյանը: Վերջինս երկու երնեկ մի տեղ է տեղավորում և՛ Տարոն Մարգարյանի մտերիմ ընկերն է, և՛ հանրապետական: Այս նշանակումը ընտրությունների նախօրեին խիստ քաղաքական որոշում էր և փաստեց դեռևս Կարեն Կարապետյանի պաշտոնանկությանը հետևած մեր վերլուծությունը, թե Կարեն Կարապետյանի հրաժարականի առավել ընկալելի պատճառը ՀՀԿ շտաբը գլխավորելու և առաջիկա ընտրություններում ՀՀԿ-ի համար ձայներ բերելու պատասխանատվությունից հրաժարումն էր: Կարեն Կարապետյանը հրաժարվեց քաղաքականացվել և, ինչպես ասում են, կեղտոտվել: Տարոն Մարգարյանը չկարողացավ պահպանել ինքնուրույնությունը և անմիջապես լծվեց քաղաքը շտաբի վերածելուն:
Այնպես որ, ինչպես սովորաբար լինում է, ընտրություններին նախորդող այս ժամանակահատվածում, աստիճանաբար կհանրապետականացվեն նաև վարչության պետերը, դպրոցի տնօրենները, որոնք էլ օգտագործելով լծակները՝ կազդեն ենթակաների ընտրության վրա:
Եվ սա հանուն վարչապետի՝ Բրյուսելում արած հայտարության, թե՝ Հայաստանը պատրաստվում է 2012 թվականին անցկացնել ամենաարդար ընտրությունները»,- գրում է «Երկիր»-ը: