Դեսպանների հարմարավետությունն ավելի կարևոր է. «հավերժ արտգործնախարարը» խոսեց

Վերլուծական 23 Ապրիլ, 2018 16:12

Այսօր կայացած ասուլիսի ընթացքում ՀՀ արտգործնախարար Էդուարդ Նալբանդյանը սրտնեղել է, թե Երևանում այս օրերին տեղի ունեցող իրադարձությունների պատճառով ԱԳՆ-ը մեծաքանակ բողոքներ է ստանում Հայաստանում հավատարմագրված դեսպաններից, թե բա՝ վերջիններիս ազատ տեղաշարժը սահմանափակվում է: Բացի այդ, «հավերժ արտգործնախարարը» կոչ է արել սփյուռքում գտնվող մեր քաղաքացիներին չվարկաբեկել և վատ դրության մեջ չդնել մեր դեսպաններին:

Իհարկե, շատ հուզիչ է, որ Նալբդանդյանն այդքան օպերատիվ կերպով է արձագանքում օտարերկրյա դեսպանների սրտի բողոքին, սակայն լավ կլիներ նաև պարզաբաներ, թե կոնկրետ որ գործողությամբ են Սփյուռքում բնակվող և իրենց քաղաքացիական դիրքորոշումը խաղաղ ցույցերի միջոցով արտահայտող մեր հայրենակիցները վարկաբեկում ՀՀ դեսպաններին: Գուցե նրանով, որ այդ երկրների հասարակության առջև բացահայտում են հայաստանյան իշխանության իրական դեմքը, որն այնքան էլ հմայիչ չէ՝ ժողովրդավարական արժեքներ դավանող Արևմուտքի համար: Նալբանդյանը, օգտվելով բողոքի ժամից՝ հայտարարեց նաև, որ ԵՄ վերջին հայտարարությունը սխալ է թարգմանվել: Հիշեցնենք՝ այդ հայտարարության մեջ ԵՄ երկրների դեսպանները անչափ կոշտ որակումներ էին տվել ՀՀ իշխանությունների վերջին օրերի գործողություններին: Մեզ մնում է հուսալ, որ գոնե ՀՀ-ԵՄ համաձայնագիրը ճիշտ է թարգմանվել, հակառակ պարագայում իշխանությունների այս մի «մեծագույն նվաճումն» էլ կասկածի տակ կհայտնվի:

Ի դեպ՝ Նալբանդյանն այս հայտարարությունը շատ նման է օրերս Էկոնոմիկայի նախարար Սուրեն Կարայանի մտքի գոհարին: Պարզվում է՝ հայաստանցիների բողոքի ձայնը էապես նվազեցրել է տուրիստների հոսքը Հայաստան: Հատկապես ՌԴ-ից: Մեծ բացահայտում էր նաև այն, որ Կարայանը գործից ազատ ժամերին ուսումնասիրում է զբոսաշրջիկների ուղևորահոսքի դինամիկան: Սակայն նախարարը չի կարողացել բերել իր մտահոգությունների գեթ մեկ իրական, թվային ապացույց, որ մենք էլ նման սրտացավությամբ վերաբերվեինք առաջացած կարևորագույն հիմնահարցին: Ստացվում է՝ մեր գերատեսչություններին ավելի շատ մտահոգում է Հայաստան ժամանող զբոսաշրջիկների և հավատարմագրված դեսպանների հարմարավետությունը, իսկ սեփական ժողովրդի հարմարավետության վրա, մեղմ ասած՝ թքած ունեն:

Ստելլա Խաչատրյան