Հայրերը որդիներին ամուսնացնում էին իրենց սիրուհիների հետ. Զաքար Խոջաբաղյան

«Հեռուստաեթերի մաքրման պահանջ» հասարակական նախաձեռնության անդամ Զաքար Խոջաբաղյանը լրագրողների հետ զրույցում նշեց հետևյալը.

- «Գալուբո» բառը 10 տարի առաջ Հայաստանում գրեթե չէր օգտագործվում, իսկ «Երևան» սերիալի «շնորհիվ» այն լայն տարածում գտավ մեր հասարակությամն մեջ։ Օրինակ, «Կյանքի գինը» սերիալի վերջին սերիայում ցույց տվեցին, որ հայրերը որդիներին ամուսնացնում էին իրենց սիրուհիների հետ։ Մի՞թե սա իրականություն է, մի՞թե սա վերցված է կյանքից։ Ո՞ր հայ տղամարդն իր սիրուհուն կամուսնացնի որդու հետ։ Սա աբսուրդ է։

«Մենք» ազգային արժեքների պահպանման հիմնադրամի հիմնադիր և գլխավոր տնօրեն Պավել Սարգյանն ավելացրեց.

- Հեռուստատեսությունները, որոնք ծաղրում են մեր ազգային արժեքները և մեր մշակույթը, պետք է ենթարկվեն տուգանքի: Օրինակ, ամեն օր ժամը 24:00-ին և առավոտյան 06:00-ին հեռուստաալիքները պետք է հնչեցնեն մեր պետական օրհներգը, սակայն երբեմն ժամը 01:00-ին, երբեմն 24։40, երբեմն ինտիմ ֆիլմ ընդհատելով են այն հնչեցնում։

Իսկ նախաձեռնության մեկ այլ անդամ՝ Վահրամ Միրաքյանը, անդրադառնալով «Հարսնաքար» ռեստորանում տեղի ունեցած միջադեպին, նշեց.

- Այսօր հեռուստատեսությամբ այդ նույն թիկնապահները ներկայացվում են որպես դրական կերպարներ, իսկ հայկական բանակի ոչ մի սպա ոչ մի դրական կերպարում հանդես չի գալիս։ Այժմ ձևավորվում է հակասոցիալական ու հակամշակութային սերունդ։