«Հայ հանդիսատեսը շատ պահանջկոտ է». Հասմիկ Պապյան

Այսօր՝ նոյեմբերի 22-ին, տեղի ունեցավ ժողովրդական արտիստուհի, օպերային երգչուհի Հասմիկ Պապյանի մամլո ասուլիսը։ «Այս անգամ անսպասելի էր, ես չէի ուզում աղմուկով նշել իմ բեմական գործունեության քսանհինգամյակը։ Ես այդ օրը երգեցի «Անուշը», որը նվիրական անուն է ինձ համար։ Ես այդպիսի հանդիսատես չէի ունեցել։ «Անուշն» ինձ համար շատ հարազատ է, քանի որ ես ամեն ինչ կարող եմ երգել դրսում, իսկ «Անուշ»՝ ոչ։ Ես կարողացա առնել կարոտս Անուշից»,– խոսքը սկսեց Հասմիկ Պապյանը։

«Թվում է, որ մենք պետք է կորցրած լինեինք մեր հադիսատեսին, բայց, ի զարմանս ինձ, այդ հադիսատեսը գալիս է թատրոն. նա ծարավ է, նա ավելին է սպասում և նրան պետք է տալ այդ ավելին»,– շարունակեց նա։ Ապա պատմեց իր անցած ստեղծագործական կյանքի մասին։

«Ես մեկնեցի միջազգային մրցույթների, մասնակցել եմ չորս մրցույթի, որոնք հարթեցին իմ ճանապարհը։ Ապա Բոննի թատրոնի ղեկավարի հրավերով ես տեղափոխվեցի Բոնն։ Առիթ ունեցա միանգամից երգելու մեծագույն երգիչների հետ։ Բայց սա ամեն ինչ չէր, ես պետք է նաև իմ ապագան ապահովեի։ Խստապահանջությունն, աշխատանքային ռիթմը հեշտ չի տրվում»,– ասաց օպերայի երգչուհին, ապա համեմատականներ անցկացրեց հայ և օտարերկրյա հանդիսատեսների միջև. «Հայ հանդիսատեսը շատ պահանջկոտ է։ Ամեն երկրում տարբեր են պահանջները՝ Ֆրասիայում չեն ծափահարում, եթե դուր չի գալիս, Իտալիայում՝ սուլում են, Գերմանիայի հանդիսատեսը շփացած է»։