«Երկիր». Բալաբեկյանի պատճառով վիրավորվել է քրոջ ամուսինը

Հունիսի 14-ի երեկոյան Չարենցավանից դեպի Ալափարս տանող ճանապարհի ձախ հատվածում դեռ ԽՍՀՄ տարիներից կառուցված, իսկ այժմ չգործող կաթսայատան ծխնելույզի ոչ ճիշտ ապամոնտաժման աշխատանքների ժամանակ մահացավ Չարենցավանի 23-ամյա բնակիչ Հովհաննես Բաբայանը: «Երկիր»-ի հետ զրուցում ոստիկանության լրատվության վարչության աշխատակից Արմեն Մւսլխասյանը հայտնել է, որ դեպքի առթիվ հարուցվել է քր. գործ: Անզգուշությամբ մահ պատճառելու համար մեղադրանք է առաջադրվել Վահագն Բալաբեկյանին: Որպես խափանման միջոց ընտրվել է գրավը: Մալխասյանը հայտնել է, որ, բացի զոհից, ապամոնտաժման աշխատանքների ժամանակ մեկն էլ վիրավորվել է:

Նա թեև չի հայտնել, թե ով է Բալաբեկյանը, բայց, թերթի տեղեկություններով, հենց նա է հավաքել բանվորների (որոնց թվում նաև նրա բարեկամներն են) և կազմակերպել ապամոնտաժման աշխատանքները: Չարենցավանում խոսում են, որ վիրավորը զրկվել է ոտքերից: Թերթի տեղեկություններով՝ նա Բալաբեկյանի քրոջ ամուսինն է: Ըստ թերթին հասած լուրերի, վերջին 20 տարիների ընթացքում Բալաբեկյանն է զբաղվել Չարենցավանում ապամոնտաժման ենթակա բոլոր շենք-շինություններով: Նա նաև հայտնի է որպես ալյումին, պղինձ Վահագ մականվամբ. Չարենցավանում ունի ալյումինի և պղնձի հավաքման կետ: