ՆԱՏՕ-ն թուրքական կործանիչի վերացման հետ կապված չծրագրված հանդիպում կանցկացնի

Թուրքիայի նախաձեռնությամբ այսօր ՆԱՏՕ-ի կենտրոնակայանում կառույցի անդամ երկրների դեսպանների մակարդակով չծրագրված հանդիպում կանցկացվի, որտեղ Թուրքիան կառույցի անդամ գործընկեր երկրներին կներկայացնի ուրբաթ սիրիական բանակի հակաօդային պաշտպանության ուժերի կողմից թուրքական կործանիչի վերացման վերաբերյալ մանրամասները, հաղորդում է ԻՏԱՌ-ՏԱՍՍ-ը։

Թուրքիայի փոխվարչապետ Բյուլեթ Առընչը նախօերին հայտարարել է, որ իր երկիրը «դեռևս քննարկում է սիրիական բանակի կողմից թուրքական կործանիչի ոչնչացմանն ի պատասխան Սիրիայի դեմ ռազմական գործողություն սկսելու հնարավորությունը»։ Նրա խոսքերով, Անկարան մտադիր է այդ հարցը լուծել բացառապես դիվանագիտական ճանապարհով։

Առընչը նշել է, որ քննարկումը կազմակերպվել է Վաշինգտոնի պայմանագրի 4–րդ կետի հիման վրա՝ այն է «խորհրդակցություններ անցկացնել դաշինքի անդամ երկրի անվտանգությանը սպառնացող վտանգի դեպքում. այլ ոչ թե ըստ 5–րդ կետի, ըստ որի խոսքը վերաբերում է կառույցի անդամ որևէ երկրի նկատմամբ մեկ այլ երկրի կողմից ագրեսիվ վարքագծի դեպքում ՆԱՏՕ–ի պատասխան հարվածին»։  

Ըստ պաշտոնական Անկարայի, թուրքական բանակին պատկանող F-4 տիպի կործանիչը Թուրքիա–Սիրիա սահմանի մոտ թռիչք իրականացնելիս խփվել է սիրիական բանակի հակաօդային պաշտպանության համակարգի կողմից։

Պաշտոնական Դամասկոսը հաստատել է այդ տեղեկությունը և ներողություն խնդրել Անկարայից, թեև սիրիական բանակի հրամանատարությունը նշել է, որ կործանիչը խփվել է Սիրիայի ջրային տարածքներում։ Որոնողական աշխատանքերի արդյունքում թուրք և սիրիացի մասնագետներին հաջողվել է գտնել կործանիչի որոշ մասեր։

Նշենք, որ ՆԱՏՕ–ն, ի դեմս Գլխավոր քարտուղար Անդերս Ֆոգ Ռասմուսենի, բազմիցս հայտարարել է, որ Սիրիային չի տեսնում տարածաշրջանում լուրջ դերակատարի դերում։ Ըստ փորձագետների, այդ միջադեպը Սիրիայի նկատմամբ ավելի կոշտ հեռահար քայլեր ձեռնարկելու լուրջ պատճառ կարող է դառնալ։