Սարսափելի ինքնասպանության մանրամասները

Ոստիկանության Քննչական գլխավոր վարչության Էրեբունու քննչական բաժնում հարուցվել է քրեական գործ ինքնասպանության հատկանիշներով: Ինչպես ավելի վաղ դեպքի վայրից Tert.am-ին հայտնել էր ֆոտոլրագրող Գագիկ Շամշյանը, այսօր՝ հունիսի 26-ին, առավոտյան ժամը 8.20-ի սահմաններում Ոստիկանության Էրեբունու բաժին ահազանգ է ստացվել, որ Այվազովսկի 68 տանը ինքնասպան են եղել հայր ու որդի:

Գ. Շամշյանը հայտնել էր, որ նշված սեփական տան 3-րդ հարկի կիսակառույց շինության մեջ ամրանից (շվելեռ) մետաղյա ճոպանով (տռոս) կախվելու միջոցով ինքնասպան են եղել 62-ամյա Պետրոս Գալուստովը և նրա որդին՝ 30-ամյա Արթուր Գալուստյանը:

Քննչական մարմինը հոր որովայնի մոտ հայտնաբերել էր նամակ, որն առգրավվել էր քննիչի կողմից:

Հարևանները ֆոտոլրագրողին պատմել են, որ հայր ու որդի արհեստավորներ են: Շամշյանը հայտնել էր նաև, որ իրենց կախվելու վայրից կես մետր այն կողմ դրված էր երկու խաչ, որի մոտ տեղադրված էր մանուկ Հիսուսի այն նկարը, որում սուրբ Մարիամ Աստվածածինը ու Հովսեփը բարուրում են նրան:

Քիչ առաջ Գ. Շամշյանը հայտնեց, որ իրեն հայտնի են դարձել նշված ինքնասպանության գործով որոշ մանրամասներ: Որդին՝ Արտաշ Գալուստյանը մի քանի օր առաջ է ազատվել «Նուբարաշեն» քրեակատարողական հիմնարկից: Նա մեկ այլ անձի հետ 2011թ. նոյեմբերին Արշակունյաց պողոտայի վրա կայանված «Ինֆինիթի» մակնիշի ավտոմեքենայի ապակին կոտրելու միջոցով հափշտակել էր ավտոմեքենայում եղած առանձնապես խոշոր (56 մլն դրամ) գումար:

Նշված գումարը պատկանում էր «Մանանա Գրեյն» ՍՊԸ-ին և այդ գումարը նշված ՍՊԸ-ի աշխատակիցը պետք է տեղափոխեր բանկ:

Նշված գողության փաստով Ոստիկանության քննչական գլխավոր վարչության Էրեբունու քննչական բաժնում հարուցվել է քրեկան գործ ՀՀ Քրօրի 177 հոդվածի 3-րդ մասի հատկանիշներով:

Ա. Գալուստյանը և նրա հետ եղած մասնակիցը կալանավորվել էին, հաղորդում է Tert.am-ը։

Հիշեցնենք, որ այսօր ՀՀ ԱԻՆ մամլո ծառայությունը, ժամը 10։36-ին տեղեկություն էր ստացել, որ Երևանի Այվազովսկի փողոցի թիվ 68 տանը հայտնաբերել են երկու քաղաքացու կախված դի:

Tert.am

Լուսանկարները՝ Գագիկ Շամշյանի