Չուգասզյանը 15 օր է՝ հացադուլի մեջ է

«Հիմնադիր խորհրդարան»-ի նախագահ, ապրիլի 24-ին ձերբակալված Գարեգին Չուգասզյանն արդեն 15-րդ օրն է՝  հացադուլի մեջ է: Այս մասին ԼՈւՐԵՐ.com-ի թղթակցի հետ զրույցում հայտնեց նրա փաստաբան Տիգրան Եգորյանը:

Նա նշեց՝ Գարեգին Չուգասզյանը կալանավայրից բարձրաձայնել է քաղբանտարկյալների` օր առաջ ազատ արձակման անհրաժեշտության մասին և այդ կապակցությամբ հայտարարել անժամկետ հացադուլ:

Խոսելով Չուգասզյանի առողջական վիճակի մասին՝ Եգորյանը նշեց, որ իր պաշտպանյալը խիստ հյուծված է. հացադուլից բացի մեծ ազդեցություն են ունեցել մինչև կալանավորվելը քաղաքական հետապնդումներից խուսափելու նպատակով ընդհատակում գտնվելու անբարենպաստ պայմանները. «Հացադուլի ամեն օրն ավելի վատ ազդեցություն է ունենում նրա վրա: Պահվում է «Նուբարաշեն» ՔԿՀ-ում և դեռ չեն տեղափոխել «Դատապարտյալների հիվանդանոց» ՔԿՀ, որպեսզի գոնե հսկողության տակ լինի»: 

Փաստաբանը նշեց, որ իր պաշտպանյալի նկատմամբ սահմանափակում է կիրառված տեսակցությունների ու հեռախոսազանգերի առումով՝ նույնիսկ ընտանիքի անդամների հետ. «Ո՛չ փաստական, ո՛չ իրավական հիմք չկա, ավելին՝ Գլխավոր դատախազության վերահսկող դատախազի գնահատմամբ նման հիմքերը վերացած էին դեռևս 2015թ. մայիսի 4-ից, երբ նրա նկատմամբ կալանքը որպես խափանման միջոց փոխարինվեց ստորագրությամբ՝ չհեռանալու մասին: Սա կոնվենցիայի 18-րդ, 3/8 հոդվածներիի խախտում է, այն է՝ անձնական, ընտանեկան կյանքի նկատմամբ հարգանք և սահմանափակումների միջոցով անմարդկային վերաբերմունք»,- նշեց նա՝ կարծիք հայտնելով, որ Չուգասզյանի նկատմամբ կալանքը որպես խափանման միջոց կիրառելը, բացի ապօրինի լինելուց՝ նաև խիստ անողջամիտ և անտրամաբանական է, քանի որ համաժողովրդական շարժմանը միանալով՝ նա ապացուցել է՝ հնարավոր քրեական հետապնդումից խուսափելու նպատակ չունի:

Հիշեցնենք՝ Գարեգին Չուգասզյանը, ապրիլի 23-ին միանալով համաժողովրդական հեղափոխությանը՝ գնացել էր Հանրապետության հրապարակ:

Այնուհետև՝ ապրիլի 24-ին, «Հիմնադիր խորհրդարան»-ի գործընկերների հետ բարձրացել էր Ծիծեռնակաբերդի համալիր՝ հարգելու Ցեղասպանության զոհերի հիշատակը։ Սակայն Ծիծեռնակաբերդի բարձունքից իջնելիս նրան դիմավորել են ոստիկանները և ձերբակալել, հետո՝ կալանավորել:

Նշենք, որ Գարեգին Չուգասզյանը 1 տարի 9 ամիս գտնվել է ընդհատակում: Չուգասզյանի նկատմամաբ քրեական հետախուզում էր հայտարարվել 2016թ.-ի հուլիսից, երբ «Սասնա Ծռեր» խումբը զինված հարձակում էր գործել Էրեբունու ոստիկանության պարեկապահակային գնդի վրա։

Ինչպես Ժիրայր Սեֆիլյանը, Գևորգ Սաֆարյանը, Պավլիկ Մանուկյանը և Վարուժան Ավետիսյանը, այնպես էլ Չուգասզյանը մեղադրվում են այն բանի համար, որ կոչ են արել անհնազանդության՝ փորձելով իշխանափոխություն իրականացնել և ազատվել գործող ռեժիմից:

Սոնա Հարությունյան