Մետրոյի շինարարները հին հռոմեական ճանապարհի հատված են հայտնաբերել

Հունաստանի Թեսալոնիկի քաղաքում մետրոյի շինարարության ընթացքում հայտնաբերվել է մոտ 2000 տարի առաջ կառուցված հռոմեական ճանապարհի մի հատված, որի տակ կա ավելի հին՝ 2500-ամյա հունական ճանապարհ, հայտնում է Associated Press գործակալությունը։

Ուղու 70 մետր երկարությամբ հատվածը ծածկված է մարմարե սալիկներով, որոնց վրա պահպանվել են սայլերի անիվների հետքեր և մանկական խաղերի նշումներ։ Գտնվել են նաև զանազան գործիքներ, անոթների կտորտանք և մարմարե սյուների պատվանդաններ։

Գտածոյի պեղումների վայրում աշխատող հնագետների խոսքերով, հռոմեական ճանապարհը կառուցվել է 1800 տարի առաջ։ Այն փռված է հին հույների կողմից 500 տարով ավելի վաղ կառուցված սալածածկ ուղու վրա։ Ճանապարհի դիրքը և դրանից ճյուղավորվող նրբանցքների դասավարությունը համընկնում է ժամանակակից Թեսալոնիկի քաղաքի ճանապարհային ցանցի հետ։ Գտածոն ունի նույն ուղղությունը, ինչ այժմյան Էգնատիա պողոտան, սակայն գտնվում է 7 մետր վար։

Գիտնականները հայտնել են, որ գտածոները մշտական ցուցադրության կհանձնվեն մետրոպոլիտենի տարածքում՝ վերջինիս կառուցումից անմիջապես հետո, ինչև նախատեսվում է 2016 թվականին։

Թեսալոնիկի քաղաքում մետրոյի շինարարությունը սկսվել է 2006 թվականին, մինչդեռ դրա ավարտը բազմիցս հետաձգվել է, այ թվում՝ հայտնաբերված հնագիտական հուշարձանների և դրանց պեղումների հետևանքով։ 2008 թվականին հնագետները հայտնաբերել էին մոտ 1000 դամբարան, որոնցից մի քանիսում գտնվել են զարդեր, արվեստի նմուշներ և դրամներ։