Դոլարի նկատմամբ լիրայի արժեզրկումը ժամանակավոր է․ Էրդողան

Թուրքիայի նախագահ Ռեջեփ Թայիփ Էրդողանը կոչ է արել երկրի քաղաքացիներին ազգային արժույթը դոլարի կամ եվրոյի հետ չփոխանակել և դրամական խնայողությունները պահել հենց թուրքական լիրայի տեսքով, հաղորդում է թուրքական TRT հեռուստաընկերությունը։

«Ես կոչ եմ անում իմ ժողովրդին, իմ քաղաքացիներին․ խնդրում եմ, ձեր ազգային դրամն օտար արժույթներով մի՛ փոխեք», – ասել է Էրդողանը։

Նա նաև հավաստիացրել է, որ լիրայի կտրուկ արժեզրկումը դոլարի նկատմամբ ժամանակավոր է, և իրավիճակը վերահսկողության տակ է։

Ըստ Էրդողանի՝ տնտեսական այս տատանումներն առկա են ամբողջ աշխարհում, և Թուրքիան, որպես զարգացող երկիր, կրում է դրա ազդեցությունը։

Նշենք, որ թուրքական լիրան այս օրերին ռեկորդային անկում է գրանցել․ այժմ մեկ դոլարը Թուրքիայում արժե 4,9 թուրքական լիրա, շաբաթվա սկզբին այդ գինը 4,5 լիրա էր, իսկ ամսվա սկզբին՝ 4,1։ Հիշեցնենք, որ անցյալ տարի Թուրքիայում մեկ դոլարի արժեքը տատանվել է 3,2-3,7 լիրայի սահմաններում։