Ճաշարանի «խիստ պետը» երկաթյա շղթայով հանել է զինվորի աջ աչքը

Գորիսի ընդհանուր իրավասության դատարանում վերջերս ավարտվել է ոչ անհայտ «Եղնիկներ» զորամասում շարքային զինծառայող Նարեկ Ավետիսյանի նկատմամբ ենթասպա Արմեն Թովմասյանի կողմից բռնություն գործադրելու համար հարուցված քրեական գործի դատաքննությունը: Դատավոր Համլետ Դավթյանի որոշմամբ զինծառայող Ավետիսյանի աջ աչքը հանած ենթասպան դատապարտվել է 3 տարի վեց ամիս ազատազրկման:

Հիշեցնենք՝ նախորդ տարի ենթասպա Արմեն Թովմասյանին մեղադրանք էր առաջադրվել ՀՀ Քրեական օրենսգրքի 375 հոդվածի 1-ին մասի հատիկանիշներով, այն է. «Պետի կամ պաշտոնատար անձի կողմից իշխանությունը կամ պաշտոնեական դիրքը չարաշահելը, իշխանազանցությունը կամ պաշտոնեական լիազորությունների սահմանն անցնելը, ինչպես նաեւ իշխանության անգործությունը, եթե այդ արարքները կատարվել են շահադիտական, անձնական այլ շահագրգռվածություն կամ խմբակային շահերից ելնելով եւ եթե դրանք էական վնաս են պատճառել» և Քր. Օր.-ի 112 հոդվածի 1-ին մասի հատկանիշներով՝ «Դիտավորությամբ մեկ ուրիշին մարմնական վնասվածք պատճառելը կամ առողջությանն այլ ծանր վնաս պատճառելը, որը վտանգավոր է կյանքի համար կամ առաջացրել է տեսողության, խոսքի, լսողության կամ որեւէ օրգանի կամ օրգանի ֆունկցիայի կորուստ կամ արտահայտվել է դեմքի անջնջելի այլանդակմամբ»: Նախորդ տարվա դեկտեմբերի 16-ից Արմեն Թովմասյանը կալանքի տակ է:

Դատական քննության ընթացքում Արմեն Թովմասյանը առաջադրված երկու հոդվածներով էլ իրեն մեղավոր է ճանաչել:

Դատական տեղեկատվական համակարգից տեղեկանում ենք, որ տուժած Նարեկ Ավետիսյանը դատաքննության ընթացքում ցուցմունք է տվել և ասել, որ 2011թ դեկտեմբերի 13-ին թիվ 38862 զորամասի 1-ին հրաձգային գումարտակից իրեն տեղափոխել են նույն զորամասի ինժեներասարկավորական վաշտ: Տեղափոխվելուց մի քանի ժամ հետո՝ ժամը 07-ի 07:30-ի սահմաններում գնացել է ճաշարան: Ճաշարանում է եղել ճաշարանի պետ Արմեն Թովմասյանը, որը մոտեցել է իրեն և ասել, որ իր հետ տեղ պիտի գնա: Ինքը փորձել է պարզել, թե ուր են գնալու, սակայն նա իրեն չի ասել: Հետո Ա. Թովմասյանը իրեն բան է ասել, որը ինքը չի հասկացել: Դրանից հետո ինքը ցանկացել է հեռանալ և երբ շրջվել է, Ա. Թովմասյանը սկզբից մեկ անգամ ձեռքով, իսկ հետո ձեռքին եղած երկաթյա շղթայով դիտավորյալ հարվածել է իր աչքի շրջանին: Ավետիսյանը նաև կարծիք է հայտնել, որ իրեն Թովմասյանը հարվածել է դիտավորյալ ու ասել է, որ ինքը ամբաստանյալ Ա. Թովմասյանից բողոք, պահանջ չունի:

Ուսումնասիրելով գործով անցնող մյուս զինծառայողների վկայությունները, ինչպես նաև ամբաստանյալի ցուցմունքը, դատարանը վերլուծել է, որ Թովմասյանը, որպես զորամասի ճաշարանի պետ-խոհարար հրահանգիչ, կոչումով ենթասպա, անցել է իր պաշտոնեկան լիազորությունների սահմանը և անձնական այլ շահագրգռվածությունից ելնելով, այն է՝ խիստ պետի տպավորություն թողնելը և ենթակա անձնակազմի նկատմամբ իր գերակայությունն ընդգծելը, տրված հանձնարարությունը չկատարելու պատճառով, 2011թ. դեկտեմբերի 14-ին ժամը 07:30-ի սահմաններում զորամասի ճաշարանի սրահում մեկ անգամ բռունցքով հարվածել է նույն զորամասի ինժեներասակրավորական վաշտի, ինժեներասակրավորական դասակի 3-րդ ջոկի սակրավոր, ժամկետային զինծառայող, շարքային Ն. Ավետիսյանի դեմքի շրջանին: Այնուհետև մարմնական վնասվածք պատճառելու դիտավորությամբ քաշել նրան և հայհոյելով իր ձեռքին գտնվող երկաթյա շղթայով մեկ անգամ հարվածել է վերջինիս դեմքին՝ պատճառելով աջ աչքի ծանր մարմնական վնասվածք:

Ըստ դատարանի եզրահանգման, Արմեն Թովմասյանը դրանով իսկ էական վնաս է պատճառել զինվորական ծառայության շահերին, պետ-ստորադրյալ հարաբերություններին, այսինքն՝ նա հանդիսանալով պաշտոնատար անձ, անձնական այլ շահագրգռվածությունից ելնելով, կատարելով իշխանազանցություն, բռունցքով հարվածել է Նարեկ Ավետիսյանի դեմքի շրջանին, այնուհետև մարմնական վնասվածք պատճառելու դիտավորությամբ քաշել է նրան և հայհոյելով իր ձեռքին գտնվող երկաթյա շղթայով մեկ անգամ հարվածել է վերջինիս դեմքին պատճառելով աջ աչքի ծանր մարմնական վնասվածք, որոնցով էլ նա ենթակա է պատասխանատվության և պատժի:

Նշենք, որ Նարեկի աչքին Թովմասյանը հարվածել է 90 սմ երկարությամբ, 42 օղակ ունեցող երկաթյա շղթայով:

Ավելի վաղ Նարեկ Ավետիսյանի հայրը` Անդրանիկ Ավետիսյանը, ասել էր, որ կատարվածի հետևանքով որդին կորցրել է աջ աչքը:

Panorama.am