Իշխանությունները 6 տարի մատը մատին չեն խփել. քաղաքագետ

Ինչպես տեղեկացրել ենք, ՀՀ նախկին ՊՆ Սեյրան Օհանյանն այսօր Սարդարապատում լրագրողների հետ խոսել է 2016 թվականի Ապրիլյան պատերազմի մասին: Պաշտպանության նախկին  նախարարն իր խոսքում մասնավորապես նշել է, որ  դիրքերի շարժը և հետագայում հակահարձակողական գործողությունները կանգնեցվել են քաղաքական որոշումների արդյունքում:  Սեյրան Օհանյանի վերոնշյալ մտքի վերաբերյալ մասնագիտական կարծիք ստանալու համար ԼՈւՐԵՐ.com-ի թղթակիցը կապ հաստատեց  քաղաքագետ Ռուբեն Մեհրաբյանի  հետ:

Մեր այն հարցին, թե ո՞ւմ միջեւ կարող են եղած լինել քաղաքական որոշումներ, և ըստ իրեն, ի՞նչ նկատի ունի նախկին Պաշտպանության նախարարը նման միտք արտահայտելով՝ քաղաքագետը պատասխանեց. «Կարծում եմ՝ խոսքն այն մասին է, որ 2016թ.-ի ապրիլի 5-ին, Մոսկվայում, մեր և Ադրբեջանի  գլխավոր շտաբների պետերը հանդիպեցին և որոշեցին դադարեցնել ռազմական գործողությունները: Իսկ ինչ վերաբերում է Ապրիլյան պատերազմի վերաբերյալ գնահատականին, ապա դա մնում է նույնը՝ քաղաքական իշխանությունները, այո՛, 6 տարի մատը մատին չեն խփել, որպեսզի ինչ-որ կերպ կասեցնեն ռուսական զինամթերքի մատակարարումն Ադրբեջան կամ հակաքայլեր ձեռնարկեն: Արդյունքում, Ադրբեջանի համար ստեղծվել են շահեկան պայմաններ և իլյուզիաներ, որ կկարողանա ուժային  ճանապարհով հաջողել»: