Հայտնաբերվել է Եվրոպայի խոշորագույն գանձարաններից մեկը

Մեծ Բրիտանիայի Ջերսի կղզի-նահանգում երկու սիրող հնագետ հայտնաբերել են Եվրոպայի հայտնի ամենամեծ գանձարաններից մեկը։

Թաքստոցից գտնված արծաթյա և ոսկյա մետաղադրամների ընդհանուր քաշը կազմում է 3/4 տոննա, հայտնում է ИТАР-ТАСС-ը։

Մասնագետների գնահատմամբ, գտածոն 2000 տարվա հնություն ունի։ Մետաղադրամները թվագրվում են մ.թ.ա. 50 թվականով։ Դրանք շրջանառության մեջ են եղել Ֆրանսիայի ներկայիս Բրետանի հյուսիսում բնակություն հաստատած կելտական ցեղերից մեկի՝ կորիոսոլիտների մոտ: Գիտնականները կարծում են, որ ֆրանսիական կելտերը գումարը թաքցրել են հռոմեական զորքերի` Ջերսի կղզի ներխուժումից առաջ։ Հուլիոս Կեսարի գլխավորած զորագունդը մ.թ.ա. 1-ին դարի կեսերին նվաճել է գալլական ցեղախմբերը։

Մետաղադրամների ճշգրիտ քանակությունը հետազոտողներին դեռևս հայտնի չէ։ Հնադարյան գանձարանի ընդհանուր արժեքը կարող Է կազմել 5-ից մինչեւ 16.5 միլիոն դոլար:

Ջերսիի արևելյան ափին գտնվող Գուրվիլ ծխական համայնքի տարածքի դաշտերից մեկը վաղուց է գրավել տեղացի հնագետների ուշադրությունը: 70-ամյա Ռեգ Մեդը գտածոն հայտնաբերել Է իր ընկերոջ՝ Ռիչարդ Մայլզի հետ։ Լսելով փոթորկից տապալված ծառի արմատների տակ գտնված մետաղադրամների մասին՝ Ռեգ Մեդը, ավելի քան 30 տարի, փորձել է այս տեղանքում գտնել ենթադրյալ գանձարանը։

Դեռ պարզ չէ, թե թանգարաններում գտածոյի վաճառքից ստացվելիք շահույթի որ մասին կարող են հավակնել սիրող հնագետները։ Ռիչարդ Մայլզի խոսքերով՝ գումարը նրանց համար հաճելի լրացում կլինի հայտնագործությունից ստացած ոգևորությանը։

«Եթե մենք գործեինք հանուն գումարի, վաղուց դադարեցրած կլինեինք աշխատանքները։ Մեզ համար կարևոր էր մետաղադրամները գտնելը և Ջերսիի բնակիչներին ևս դրանք տեսնելու հնարավորություն տալը,-նշել է նա։