Բակո Սահակյանը չի իրականացրել 2007 թվականի նախընտրական ծրագիրը. Վիտալի Բալասանյան

Ֆեսյբուքյան իր էջում ԼՂՀ նախագահի թեկնածու Վիտալի Բալասանյանը գրում է.

«Ֆեյսբուքի օգտատերերից մեկն ինձ հարց էր ուղղել, թե ինչ կետեր չեն կատարվել Բակո Սահակյանի 2007թ. նախընտրական ծրագրից:

Համաձայն 2007թ. Բակո Սահակյանի նախընտրական ծրագրի, նա ԼՂՀ տեսնում էր որպես միջազգայնորեն ճանաչված, ուժեղ պետություն: Դժվար չէ նկատել, որ Արցախի միջազգային ճանաչում տեղի չի ունեցել, գործողը իշխանությունները արտաքին քաղաքականություն փաստացի չեն վարում:

Սահակյանն Արցախը տեսնում էր ճանաչված պետություն, ուր.
- գործում է ժողովրդավարությունը.

Սահակյանի իշխանության գալու պահից ամեն ինչ արվել է ընդդիմության բացառման, անկախ մամուլի բացակայության, անվտանգության և իրավապահ կառույցների դերի անհարկի բարձրացման համար, ինչն էականորեն թուլացրել է Արցախի դիրքերը և ժողովրդավարական կերպարը, միջազգային իրավապաշտպան կազմակերպություններն իջեցրել են Արցախին տրվող վարկանիշը՝ դասելով ոչ ազատ երկրների շարքին:

- պետական պաշտոնյաները բանիմաց են, օրենքին հնազանդ և կոռումպացված չեն.

Ցավոք սրտի մեր երկրում լուրջ խնդիր կա կադրային քաղաքականության և պետական պաշտոնյաների կոմպետենտության հետ: Երկրի ամենակոռումպացված պաշտոնյան հենց նախագահ Սահակյանն է, ում մերձավորները վերջին տարիներին իրենց ձեռքերում են կենտրոնացրել տարբեր բիզնեսներ: Հպանցիկ հայացքը վերջին տարիներին ցույց է տալիս, թե միայն ում բիզնեսներն են վերջին տարիներին ծաղկել:

- երաշխավորված է մտքի, խոսքի և խղճի ազատությունը.

Անկախ ու ազդեցիկ մամուլի փակվելը, ինչպես նաև բարձրակարգ լրագրողների հեռանալն Արցախից ցույց է տալիս, թե ինչքանով է խոսքի ազատությունը երաշխավորված:

-առանձնահատուկ հարգանք է դրսևորում տարեցների ու վետերանների, զոհված զինծառայողների ընտանիքների նկատմամբ.

Այսօր զոհված զինծառայողների բազմաթիվ ընտանիքիներ չեն ստանում իրենց հասանելիք աջակցությունը՝ տան նորոգման և վերականգման հետ կապված: Նախընտրական հանդիպումներում ինձ ուղղված նամակների մեծ մասը հենց այս խնդրին են վերաբերվում: Հարյուրավոր մարդկանց զրկել են հաշմանդամի կարգից և համապատասխան նպաստից՝ նյութական մեծ հարված հասցնելով նրանց ընտանիքներին:

-քաղաքացին կարող է օգտվել բժշկական որակյալ սպասարկումից.

Դժբախտաբար մենք դեռ շատ հեռու ենք բժշկական որակյալ սպասարկումից, շատերը հսկայական գումարներ են ծախսում իրենց հարազատներին Երևանում բուժելու համար: Բժշկական ոլորտի այս վիճակը, բուժաշխատողների ցածր աշխատավարձերը լրջագույն մարտահրավեր են մեր հասարակությանը և առաջացնում են մեծ դժգոհություններ:

-տարեց մարդը կարող է ստանալ արժանավայել թոշակ.

Այսօր ծերության թոշակները բավականին հեռու են սպառողական զամբյուղից: Հայաստանում թոշակների բարձրացնելը թեև ազդել է ղարաբաղյան թոշակների բարձրացման վրա, սակայն թոշակն այսօր սպառողական զամբյուղի գրեթե կեսին է հավասար: Հետևաբար անիմաստ է արժանավայել թոշակի մասին խոսել:

-մարդն ապահովված է աշխատանքով և արժանավայել աշխատավարձով.

Կարելի է հետևել միայն ԱրՊՀ շրջանավարտներին՝ հասականալու համար, որ մենք լուրջ խնդիրներ ունենք աշխատատեղերի ստեղծման գործում: Ավելին, իրականության մեջ տեղի է ունեցել գործազրկության աճ:

-տնտեսությունը բնութագրվում է զարգացման կայունությամբ և երաշխավորված է տնտեսական գործունեության ազատությամբ:

Տնտեսության մեջ տարբեր ոլորտների մոնոպոլիզացիան այսօր անհարկի թանկացումների է բերել հեղուկ գազի ոլորտում, տաքսի ծառայություններում, խոչընդոտվել են մի շարք գործարարների գործունեությունը, հարկային և այլ մահակների միջոցով վերջիններս սննկացվել են, զրկվել բիզնեսներից, որոնց տիրացել են Բակո Սահակյանի մերձավորները:

2007թ. այսպես էր պատկերացնում Արցախի զարգացումը նախագահի թեկնածու Բակո Սահակյանը: Իր գործունեության արդյունքում մենք ունենք ամբողջովին հակառակ պատկերը: