Գյուղացին վաճառում է իր ունեցվածքը վիրահատության դիմաց վճարելու համար. Շահեն Խաչատրյան

Այսօր «Քանկոր» սիրտանոթային բժշկական կենտրոնի տնօրեն, սրտաբուժության ասոցիացիայի նախագահ Շահեն Խաչատրյանը լրագրողների հետ հանդիպման ժամանակ խոսեց սիրտանոթային հիվանդության, դրա բուժման և նման հիվանդություն ունեցող մարդկանց մասին։

Նա նշեց, որ այս հիվանդության ցուցանիշը միշտ էլ բարձր է եղել ոչ միայն Հայաստանում, այլև ամբողջ աշխարհում։ Միայն 20-րդ դարում այս հիվանդության պատճառով մահացության թիվն ավելի բարձր է եղել, քան բոլոր պատերազմների և աղետների հետևանքով զոհվածների թիվը։ Այս խնդիրը համաշխարհային բնույթ է կրում։ Միայն Հայաստանում բնակչության գրեթե 30%-ի մոտ կա այս հիվանդությունը։ Հիվանդության պատճառները տարբեր են և դա չի կարելի կապել միայն սթրեսների հետ։ Մեր բնակչությունը սթրեսային վիճակում չէ, այլ ունի ճիշտ կեցության, ապրելակերպի կուլտուրայի պակաս։ Այն հատկապես վերաբերում է սննդակարգին (ճարպակալում, արյան մեջ խոլեսթերինի և շաքարի տոկոսի գերբարձրացում):

Lurer.com-ի ուղղած հարցին, թե ինչ քայլեր է ձեռնարկում պետությունն օգնելու համար սոցիալապես անապահով ընտանիքներին, ովքեր ունեն նման հիվանդություն և վիրահատության կարիք (իսկ նման վիրահատության գումարը բավականին բարձր է), Շահեն Խաչատրյանը պատասխանեց, որ այսօր դա կարևորագույն խնդիրներից մեկն է և իրենք հաճախակի են նման իրավիճակների բախվում։ Իր կարծիքով, մինչ ավտոմեքենաների ապահովագրման օրենքն ընդունելը, առաջնահերթ կերպով մարդու առողջությունը պետք է ապահովագրվեր։ Պետությունն այսօր մտածում է այդ հարցի շուրջ և դա առաջին քայլն է։ Նա ասաց, որ ինքը կարող է որպես մասնագետ օգնել, բայց ֆինանսապես, սեփական միջոցներով՝ չի կարող, քանի որ բուժման միջոցները, վիրահատական սարքավորումները բավականին թանկ են գնվում և բերվում են Եվրոպայից։ Եթե այս վիրահատությունը Եվրոպայում արժի 15000 եվրո, ապա մեզ մոտ կրկնակի ցածր է՝ կապված մեր ընդհանուր սոցիալական վիճակի հետ։

Բանախոսն ասաց նաև, որ ինքն էլ է շատ վատ զգում, երբ գյուղացին, չունենալով բուժման համար գումար, վաճառում է իր ունեցվածքը վիրահատության դիմաց վճարելու համար։