Քննարկվեցին UNICEF-ի հետ իրականացվող ծրագրերի ընթացքին առնչվող հարցեր

ՀՀ փոխվարչապետ, տարածքային կառավարման նախարար Արմեն Գեւորգյանն այսօր ընդունեց ՄԱԿ-ի մանկական հիմնադրամի (UNICEF) հայաստանյան ներկայացուցիչ Հենրիետ Արենսին:

Կողմերը քննարկեցին ՄԱԿ-ի մանկական հիմնադրամի աջակցությամբ երեխաների պաշտպանության եւ սոցիալական ծառայությունների զարգացման ոլորտներում իրականացվող ծրագրերի ընթացքին առնչվող հարցեր:

Տկն Արենսը ներկայացրեց իրենց ուսումնասիրությունների արդյունքները` հատուկ կրթական հաստատություններում իրականացվող ծրագրերի վերաբերյալ, ինչպես նաեւ անդրադարձավ սոցիալական ծառայողների վերապատրաստման ծրագրին` հատկապես գոհունակություն հայտնելով Սյունիքի մարզում համատեղ աշխատանքի արդյունքներից:

Զրուցակիցները սոցիալական ծառայողների վերապատրաստման ծրագիրը կարեւորեցին հանրապետությունում սոցիալական ինտեգրված ծառայությունների ներդրման գործընթացի համատեքստում:

Պայմանավորվածություն ձեռք բերվեց նաեւ, որ UNICEF-ի հայաստանյան գրասենյակն առաջարկություններ կներկայացնի` իրականացվող որոշ ծրագրերի արդյունավետության բարձրացման ուղղությամբ: