ԱԻՆ ճգնաժամային կառավարման կենտրոնը՝ նաև ՀԱՊԿ-ի ուշադրության կենտրոնում

Այսօր՝ նոյեմբերի 22-ին, Արտակարգ իրավիճակների նախարարություն այցելեց Հավաքական անվտանգության պայմանագրի կազմակերպության (ՀԱՊԿ) պատվիրակությունը` ՀԱՊԿ գլխավոր քարտուղարի տեղակալ Վալերի Սեմերիկովի գլխավորությամբ։
Պատվիրակությունը Հայաստան է ժամանել` նպատակ ունենալով մի շարք նախարարությունների և գերատեսչությունների հետ քննարկելու և ճշգրտելու մյուս տարի Հայաստանում անցկացվելիք ՀԱՊԿ օպերատիվ արձագանքման հավաքական ուժերի համալիր զորավարժության նախապատրաստման աշխատանքները։ Այդ հարցերը քննարկվեցին նաև Արտակարգ իրավիճակների նախարարության ներկայացուցիչների հետ։

Մեծ կարևորություն տալով համատեղ զորավարժությանը, ՀԱՊԿ ներկայացուցիչները ցանկացան լսել հայկական կողմի կարծիքները և առաջարկները` կապված զորավարժության կազմակերպման հետ։ Քննարկվեցին զորավարժության տևողության, շտաբային ու պրակտիկ փուլերի բաժանման և կազմակերպչական այլ հարցեր։
ՀԱՊԿ գլխավոր քարտուղարի տեղակալը նշեց, որ մյուս տարի կդիտարկվի նաև Հայաստանի արտակարգ իրավիճակների նախարարության հետ համատեղ ուսումնավարժություն անցկացնելու հնարավորությունը։ 
Հյուրերն այցելեցին նաև ԱԻՆ Ճգնաժամային կառավարման կենտրոն, ծանոթացան դրա աշխատանքին։ Պարոն Սեմերիկովը նշեց, որ այս կենտրոնը շատ արդյունավետ է աշխատում, գործարկված է ամբողջ ծավալով և ընդգծեց, որ շատ լավ կլինի, որ Ճգնաժամային կառավարման կենտրոնն իր բոլոր գործառույթներով ներգրավվի զորավարժության ընդհանուր սցենարի մեջ։